Qazaq poezııasyna ózine tán qońyr únimen kelgen aqyn ónimdi eńbek etip, sońyna mol mura qaldyrdy. Onyń «Kókjıegim – keleshegim», «Shyrqaý», «Shopan balasy», «Jylqyshynyń uly», «Oısylqara», «Altyn bosaǵa», «Shuǵylaly shaqtar», «Pir Beket pen Jyr Zeket», «Oǵylandy» jáne basqa da jyr jınaqtary kezinde ádebıet synshylary men oqyrmandardan óz baǵasyn alǵan.
Is-shara barysynda balalar jazýshysy Tolymbek Ábdiraıym, aqyn «Túrkistan» gazetiniń bas redaktory Baýyrjan Babajanuly, aqyn Ahmet Kendirbekuly qarymdy qalamgerdiń azamattyǵy men shyǵarmashylyǵy týraly jyly estelikterimen bólisti. Sondaı-aq ustaz Raýshan Qurmanǵalıeva avtordyń «Qasıetti qazyna» atty kitabyndaǵy óleńderdi bastaýysh synyptardyń oqýlyǵyna engizilse degen usynysyn aıtty.
Aqynnyń balalarǵa arnalǵan «Aqmeshit» atty kitabyna Beket ata týraly «Kıe» poemasy, sondaı-aq «Beıbarys», «Arýaq», «Dalabaı», «Asaly-Kóketaı» jáne basqa da týyndylary ense, «Qasıetti qazyna» atty jınaqqa ulttyq qundylyqtardy dáriptegen balalardyń uǵymyna jeńil shyǵarmalary toptastyrylǵan. Al «Barmaqbaıdyń basynan keshkenderi» kitabynda avtor tórt túlik mal, er qanaty – jylqy, túıe men sıyr, qoı týraly jyrlaı otyryp, aýyl ómirin, tórt túliktiń qasıetin balalarǵa alýan qyrynan tanystyrady. Jańa kitaptar «Káýsar» baspasynan jaryq kórdi. Onda Ábilqaıyr Jantasov, Kamıla Japalova sekildi qylqalam sheberleriniń sýretteri paıdalanylǵan. Muqabasyn sýretshi Almas Syrǵabaı bezendirgen. Mazmundy shara sońynda qalamgerdiń qyzy, aqyn, aýdarmashy, halyqaralyq «Alash» ádebı syılyǵynyń laýreaty Marjan Ershý atalǵan jańa kitaptardy Ulttyq akademııalyq kitaphana qoryna tapsyrdy.
