Jiger bergen «Jas sarbaz»

«Jas sarbaz» qozǵalysynyń maqsaty – balalardy el tarıhyn qurmettep, ata-babalarymyzdyń erlikke toly ótkenin maqtan tutarlyq rýhta tárbıeleý. Osyndaı tárbıe alǵan jastar naǵyz patrıot bolyp ósip, el táýelsizdigin eń joǵary qundylyq dep túsinetin bolady», deıdi áskerı-patrıottyq qozǵalys tóraǵasy, maıor Meıirbek Meńdiǵalıev.

Búginde áskerı-patrıottyq klýbtyń elimizdegi 20 fılıalynda 280 myńnan astam bala tárbıe alyp jatyr. Bes jyl ishinde qozǵalys aıasyna 9 myńǵa jýyq áskerı-patrıottyq uıym engen. Onyń ishinde júzden astam ujym áskerı bólimderde jumys istep keledi. Oǵan qala mektepterinde ashylǵan «Jas sarbaz» synyptary men «Smart sarbaz» úıirmelerin qosýǵa bolady.

«Jas sarbaz» qozǵalysy – 2025 jylǵa deıingi jastarǵa áskerı-patrıottyq tárbıe berý baǵdarlamasynyń negizgi quramdas bóligi. Maıor M.Meńdiǵa­lıevtiń aıtýynsha, bul qujat táýelsizdik jyldarynda jınaqtalǵan bilim men tájirıbe, sondaı-aq áskerı-patrıottyq tárbıe dástúrleri negizinde daıyndalǵan. Baǵdarlamada jastardyń kúrdeli geosaıası jaǵdaılarda Otandy qorǵaýǵa daıyndyǵyn qalyptastyrýdaǵy úzdik­siz tárbıe úrdisiniń mańyzy eske­ril­­gen. Ol áskerge shaqyrylǵanǵa deıingi jastardyń áskerı qyzmetke yntasy men daıyndyǵyna qatysty kóptegen máseleni sheshýde memlekettik qurylymdar men azamattyq qoǵamnyń ózara is-qımylynyń negizin qalaıdy.

Sonymen qatar tóraǵa qozǵalystaǵy tárbıe jumystary negizgi baǵyttarǵa bólinetinin atap ótti. Onyń ishinde «Bilimdi «Jas sarbaz» baǵyty balalar, jasóspirimder men jastar arasynda bilim berý kýltin, tarıhı bilimdi, shet tilderin, zamanaýı tehnologııalardy meńgerýdi nasıhattaýǵa, básekege qabiletti tulǵany qalyptastyrýǵa arnalǵan. Al «Sanaly «Jas sarbaz» baǵyty óskeleń urpaqtyń boıynda joǵary moraldyq-iskerlik qasıetterdi damytý, mádenı biregeılikti saqtaý, etnosaralyq tatýlyq pen kelisimdi nyǵaıtý maqsattaryn qamtıdy.

«Jigerli «Jas sarbaz» jastardyń salamatty ómir salty ustanýyna, deneshynyqtyrýmen jáne sportpen shuǵyldanýyna, joǵary erikti qasıetterdi nyǵaıtýǵa degen umtylysyn jappaı qalyptastyrýǵa baǵyttalǵan. «Bolashaǵy jarqyn «Jas sarbaz» óskeleń urpaqty tarıhqa, táýelsizdik jetistikterine baýlýǵa, qazaqstandyq patrıotızmdi jáne óz Otanyna degen adaldyqty nyǵaıtýǵa negizdelgen.

Qorǵanys mınıstri, general-polkovnık Rýslan Jaqsylyqov bul baǵyttaǵy is-sharalarǵa jiti kóńil bólip keledi. Adamdy patrıot etip qalyptastyratyn kúsh – tálim-tárbıe, sapaly bilim, sanaly orta jáne jaýapkershilik. Qorǵanys mınıstri jas Otan qorǵaýshylardyń tárbıesinde osy qaǵıdalarǵa barynsha basymdyq berip otyr.

Bul turǵyda respýblıkalyq áskerı­patrıottyq qozǵalystyń irge­ta­syn qalaý­shy ári alǵashqy kúnnen qo­ǵam­dyq­ uıymnyń tóraǵasy, Qorǵanys mınıstriniń orynbasary, general-leıtenant Muhamedjan Talasovtyń eńbegin erekshe atap ótti.

Búginde jas sarbaz bolyp tárbıe­le­nip jatqan árbir jasóspirim asa maq­ta­nyshpen kıetin, jaı ǵana kıim emes, ulttyq rýh pen qazaqstandyq patrıottar kelbetiniń kórkin ashatyn «Jas sarbaz» formasy bekitildi. Keýdesinde eldiń abyroıy men egemendigin arqalaıtyn árbir jastyń tegi kórsetiletin bul kıim úlgisi jas sarbazdardyń qurmetti kıim úlgisine aınaldy. Sonymen qatar árqashan baǵa jetpes tynyshtyq pen birtutastyqty, bultsyz ashyq aspandy, elimizdiń táýel­sizdigin, beıbit kúndi beıneleıtin, aıbyn­dylyqty, qýattylyq pen nyq qozǵalysty, kóshbasshylyqty, kúsh pen jigerlilikti sıpattaıtyn «Jas sarbaz» qozǵalysynyń logotıpi bekitilgen.

«Jas sarbaz» qozǵalysy tek pat­rıot­tyq tárbıe beretin uıym ǵana emes, bul kemel keleshekke degen ortaq maqsaty bar jastardyń ortasyna aınal­ǵanyn aıta ketý kerek», deıdi qozǵalys tóraǵasy. – Bul rette jas patrıottyń beınesin qalyptastyrýda 2015 jyldan beri ótip kele jatqan «Aıbyn» respýblıkalyq áskerı-patrıottyq jıyny da erekshe oryn alady».

2019 jyly Prezıdent – Qarýly Kúshterdiń Joǵarǵy Bas qolbasshysy Qasym-Jomart Toqaevtyń qatysýymen V «Aıbyn» respýblıkalyq áskerı-patrıottyq jastar jıyny ótkeni belgili. Onda Memleket basshysy «Jas sarbaz» qozǵalysynyń tárbıelenýshilerimen birge áskerı-patrıottyq jıynnyń ashylýynda «Uly dala jas sarbazy – 2050» ýaqyt kapsýlasyn saldy.

«Jas sarbaz» qozǵalysynyń bazasynda «Smart sarbaz» úıirmelerin qurylýyna da Qasym-Jomart Toqaev 2019 jylǵy mamyrda Qorǵanys mınıstr­li­giniń keńeıtilgen alqa otyrysynda bas­ta­mashylyq etken bolatyn. Kadrlar daıarlaý jáne áskerı-patrıottyq tárbıe berý sheńberinde «Smart sarbaz» bolashaq áskerı ınjenerlerdi, IT-maman­dardy, robottehnıkterdi, jasandy ıntellekt boıynsha mamandardy tárbıeleý qajettigin atap ótken Prezıdent mundaı úıirmelerdi eń aldymen fızıka-matematıkalyq beıimdiligi bar mamandandyrylǵan mektepterde qurý qajet ekenine toqtaldy.

«Smart sarbaz» úıirmelerinde patrıottyq is-sharalardan bólek balalar jańa ınnovasııalardy ıgerip, ózderiniń tehnıkalyq ıdeıalaryn iske asyrady, – deıdi qozǵalys tóraǵasy. – Bul rette, jumysty taldaý nátıjeleri jalpy bilim beretin mekemelerdegi áskerı-patrıottyq klýbtar, «Jas sarbaz» synyptary jáne «Smart sarbaz» úıirmeleri sanynyń 2018 jylǵy 2828-den 2,5 ese ósip, bıyl 5 myńǵa deıin jetýi bul baǵyttaǵy oń dınamıkany kórsetedi».

Sondaı-aq maıor M.Meńdiǵalıev «Jas sarbaz» qozǵalysy aıasynda belgili bir nátıjelerge qol jetkizilgenin de atap ótti. Birinshiden, oqýshylardyń sabaq úlgerimi artyp, tártibi jaqsarǵan. Balalar men jasóspirimder qylmysynyń deńgeıi 26,8 paıyzǵa tómendegen. «Jas ulan» respýblıkalyq áskerı mektepterinde, áskerı kolledjderde jáne elimizdiń joǵary áskerı oqý oryndarynda bilim alǵysy keletin jasóspirimder sany aıtarlyqtaı kóbeıdi. Alǵashqy nátıjesi de joq emes. Máselen, Arys qalasynan «Úzdik sarbaz» atalymy boıynsha 2020 jylǵy «Aıbyn» jıynynyń jeńim­pazy Meıirhan Tólbasy Qurlyq ásker­­leriniń áskerı ınstıtýtyna oqýǵa tústi. Batys Qazaqstan oblysy «Jas sarbaz» qozǵalysy fılıalynyń tór­aǵa­sy Shavkat Jumalıev Desanttyq-shabýyldaý áskerlerinde merzimdi qyzmet atqaryp, atalǵan áskerı oqý ornynyń kýrsanty atandy.

Ár jyldardaǵy «Aıbyn»» jıy­nynyń jeńimpazdary shetelde áskerı isti úırenýge múmkindik aldy. Mysaly, Rústem Jádiger Reseı Federasııasy Qor­­ǵa­nys mınıstrliginiń áskerı ýnı­ver­­­­­sı­­tetine qabyldansa, Dmıtrıı Iаıs­kıı Novo­sibir jalpyáskerı koman­­da­lyq ınstı­týtynda, al Dáýlet Aıdar­be­kov Sankt-Peterbýrg qala­syn­daǵy Áskerı-teńiz ınstıtýtynda oqyp jatyr. Jam­byl­ oblysy «Jas sarbaz» qoz­ǵa­ly­sy fılıa­­ly­nyń tóraǵasy Dýlat Ábdi­samat qazir Memlekettik kúzet qyz­metinde eńbek etedi. «Aıbyn-2022» jeńim­pazy, Jetisý oblysy «Jas sarbaz» qoz­ǵa­­ly­sy­nyń tárbıelenýshisi Sultan Serik­­uly – búginde Radıoelektronıka jáne baılanys áskerı ınstıtýtynyń kýr­santy.

Batyl áreketimen jol-kólik oqı­ǵa­sy­nyń aldyn alǵan «Jas sarbaz»­ áskerı-patrıottyq klýbynyń tárbıe­le­ný­shisi, Almaty oblysynyń Ile aýdanyna qarasty О́tegen batyr kentindegi №24 lıseıdiń 8-synyp oqýshysy Aqjol Geroı­dyń erligin búginde búkil el biledi. Qorǵa­nys mınıstri Rýslan Jaqsylyqov syn­darly sátte atyna zaty saı naǵyz batyr ekenin dáleldegen jas batyrdy «El qorǵany» medalimen marapattady.