Bul kórmeniń bir ereksheligi bar. Bıyl sýretshi alty aıǵa jýyq elimizdiń birneshe qalasyna saıahatqa shyǵady. Onyń sapary Almatydan bastalyp, sodan Shyǵys Qazaqstan men Mańǵystaýdy asyp, odan keıin Túrkistan men Shymkentti basyp, jolaı Qaraǵandyǵa soǵyp, Astanada túıindeledi. Sapar barysynda fotograf qazaq jeriniń baı tabıǵatyn kórip, tereń tarıhymen tanysyp, saf aýasymen tynystap, el turǵyndarymen kezdesip, kóp nársege qanyǵady. A.Jelanskıdiń kórmege qoıylǵan 45 týyndysynyń deni osy shyǵarmashylyq saparynyń jemisi deýge bolady. Sýretshiniń qyraǵy janaryna ilikken qazaq dalasyndaǵy tabıǵattyń ǵajaıyp kórinisteri, ótken kúnnen syr shertken tarıhı eskertkishteri, aýyl adamdarynyń tirshiligi, alyp shaharlardyń beınesi – sulýlyǵymen, shynaıylyǵymen tartymdy shyqqan. Sýretterdegi tústerdiń alýandyǵy óte keremet. Qarapaıym adam baıqaı bermeıtin qubylystardy fotograf dál bederlegen.
Is-sharanyń ashylýynda Mádenıet jáne aqparat vıse-mınıstri Arman Júdebaev atalǵan kórmeniń Qazaqstan men Fransııanyń mádenı yntymaqtastyǵynyń jarqyn úlgisi ekenin aıta kelip, osyndaı óner jobalary halyqtardy bir-birimen jaqyndastyratyn alyp kúsh ekenin atap ótti. Al Fransııanyń Qazaqstandaǵy Tótenshe jáne ókiletti elshisi Dıde Kaness myrza osy mádenı sharany ótkizýge qoldaý kórsetken barsha azamatqa rızashylyǵyn jetkizdi.
«Sıfrly kúz» festıvaline sandyq ónerdiń jańa formasy sanalǵan vırtýaldy shyndyqtyń kórneki shyǵarmalary usynyldy. Oǵan «On the Morning You Wake (To the End of the World)» jobasy sekildi sońǵy jyldardaǵy tanymal VR jobalary endi. Joba avtory – Parıjde ornalasqan Atlas V stýdııasy.
Festıval aıasynda Atlas V stýdııasynyń jobasynan basqa, Venesııa halyqaralyq kınofestıvalinde «Eń úzdik ımmersıvti» jobasy atalymynda 2020 jáne 2021 jyldary bas júlde alǵan «Hangman at Home» jáne «Goliath: Playing with Reality» týyndylary kórsetildi. 2020 jylǵy jeńimpaz Karl Sandbýrgtiń 1922 jylǵy óleńinen («What does the hangman think about when he goes home at night from work?») shabyttanǵan anımasııalyq VR esse «Hangman at Home» boldy. Al 2021 jyly bas júlde alǵan «Goliath: Playing with Reality» týyndysy Golıaf esimdi adam ómirin mysalǵa ala otyryp, densaýlyqqa keri áseri tıetin kompıýterlik oıyndardy taldaý arqyly shyndyq shekarasyn zertteıdi.
