Qoǵamdaǵy qaýipsizdik pen tártip – ortaq maqsat. Osyny jalaý etken janashyrlar 400-ge jýyq reıd júrgizgen. Olar oıyn-saýyq oryndaryn, saıabaqtardy, turǵyn úılerdiń aýlalaryn aralap, túnde jol erejeleriniń saqtalýyn baqylaǵan. Kúni búginge deıin shamamen 8 600 quqyq buzýshylyq faktisin tirkegen.
«Kúndelikti is-áreketimizde meıirimdilik pen adaldyqty, tártip pen tárbıeni basshylyqqa alyp, ádep normalaryn múltiksiz saqtaý – damyǵan qoǵam qalyptastyrýdyń negizi. Biz úshin «Qaýipsiz qoǵam» qaǵazdaǵy mindetterdiń tizimi ǵana emes, bul – eń aldymen, bolashaqqa qamqorlyq. Bizdiń áreketimiz otandastarymyzdyń ómirin jaqsy jaqqa ózgerte alady dep senemin. Bárimiz jumylyp, muqtaj jandarǵa volonterlik, qaıyrymdylyq kómek kórsetýge daıynbyz», dedi «Jastar rýhy» tóraǵasynyń orynbasary Aqerke Eskendirova.
IIM Ákimshilik polısııa komıteti basqarmasynyń basshysy Ǵalym Sarǵulovtyń sózinshe, «Qaýipsiz qoǵam» naýqany halyq arasynda «Ádiletti Qazaqstan» tujyrymdamasyna sáıkes jańa quqyqtyq mádenıetti qalyptastyrýǵa sep bolady. Osy rette mınıstrlik jastarǵa zań jáne tártip týraly dárister ótkizgen. Oǵan qosa turmystyq zorlyq-zombylyqtyń aldyn alý boıynsha is-sharalar uıymdastyrǵan.
«Zań men tártipti saqtaýdyń aldyńǵy shebinde turyp, biz polısııa qyzmetkerleri óz mindetimizdi oryndap qana qoımaı, qoǵam tynyshtyǵyn qorǵaýdy ómirlik muratymyzǵa aınaldyrdyq. Bizdiń jumysymyz – quqyqtyq tártipti saqtaý, zań buzýshylyqtardy anyqtaý ǵana emes, sonymen qatar kópshilik kún saıyn kezdesetin qıyndyqtardyń aldyn alý, qoǵamda senimdi qarym-qatynas ornatý. Qıyndyqqa tap bolǵandarǵa kómektesý, túrli daý-janjaldyń aldyn alý – biz úshin jaı ǵana mindet emes, úlken abyroı. Otandastarymyzben birge qaýipsiz, úılesimdi qoǵam quryp jatyrmyz dep senemiz», dedi Ǵ.Sarǵulov.
Máselen, Aqmola oblysynda polısııa qyzmetkerleri «Jastar rýhy» belsendilerimen birge arnaıy esepke alynǵan 1 myńnan astam adamdy tekseripti. Nátıjesinde, usaq buzaqylyq, ishimdik ishý nemese qoǵamdyq oryndarda mas kúıinde júrý sekildi 564 ákimshilik quqyq buzýshylyq faktisiniń jolyn kesken. Patrýldik jasaqtar 250-den astam jol qozǵalysy erejelerin buzǵan jaǵdaıdy anyqtaǵan. Al Petropavlda ıývenaldy polıseıler, ýchaskelik ınspektorlar men jastardan quralǵan mobıldi toptar qalanyń birqatar mektebinde «dabyl túımeleri» men kúzettiń bar-joǵyn jiti teksergen.
«Búginde oblysta «qolaısyz otbasylar» sanatynda 150-ge jýyq shańyraq esepte tursa, olardyń 110-y esepke bıyl qoıyldy. Qańtardan bastap 62 zańdy ókil ata-ana quqyǵynan aıyryldy, 727 adam ata-ana mindetterin oryndamaǵany úshin ákimshilik jaýapkershilikke tartyldy. Iývenaldy polısııa qyzmetkerleri jıi kezdesetin quqyq buzýshylyq – jasóspirimderdiń zańdy ókilderinsiz túnde úıden tys jerde bolýy. Jyl basynan beri osyndaı 2 358 derek anyqtaldy», dedi Soltústik Qazaqstan oblysy PD Jergilikti polısııa qyzmeti basqarmasynyń basshysy Aıdyn Baımatov.
