«Quqyq qorǵaý organdarynyń basty qyzmeti – elimizdegi, sonyń ishinde oblys aýmaǵyndaǵy tynyshtyqty qorǵaý. Osy maqsatta polısııa qyzmetkerleriniń atqaryp jatqan jumysy óte belsendi de salmaqty. О́ńirde ótken jylmen salystyrǵanda qylmys sany 25 paıyzǵa azaıdy. О́kinishke qaraı jol-kólik oqıǵalary azaımaı tur. Tipti byltyrmen salystyrǵanda sany arta túsken. Sondyqtan polısııa qyzmetkerlerine osy jeńil avtokólikti satyp alyp berýge týra keldi. Bıyl biz oblys bıýdjetinen byltyrmen salystyrǵanda polısııa qyzmetkerleriniń jumysyn qamtamasyz etýge qarajatty 20 paıyzǵa kóbirek bóldik. Endi aldaǵy ýaqytta polısııa burynǵydan da nátıjeli qyzmet kórsetedi dep senemiz. Quqyq qorǵaý organdarynyń materıaldyq-tehnıkalyq bazasyn únemi jaqsartyp otyrý – prezıdenttiń tapsyrmasy. Bıyl Oral jáne Aqsaı qalalaryndaǵy qoǵamdyq tártipti qadaǵalaý úshin beınebaqylaý kameralaryn satyp alyp berdik. Mundaı qoldaý aldaǵy ýaqytta da jalǵasady», dedi saltanatty is-sharada sóılegen Batys Qazaqstan oblysynyń ákimi Narıman Tóreǵalıev.
Polısııanyń materıaldyq-tehnıkalyq bazasyn jaqsartý úshin oblystyq bıýdjetten bólingen qarjy 5,7 mlrd teńge bolypty. Jańa kólikterdiń 45-i qalalyq, 45-i oblystyq patrýldik polısııa batalonyna tapsyrylǵan. Dál osy patrýldik polısııa qyzmetkerleri jyl basynan beri oblys aýmaǵynda tonaý, qaraqshylyq, urlyq boıynsha 200-den astam qylmysty ashqan eken. Jalpy óńirde bıyl 190 myńnan asa jol erejesi buzylǵan. Bul – tirkelgen qylmys.
BQO polısııa departamentiniń bastyǵy Arman Orazalıev jańa kólikterdiń óńirdegi jol-kólik oqıǵalarynyń sanyn azaıtýǵa septigin tıgizetinine senimdi. Osy kólikterdiń ishinde úsheýi erekshe – «kıber-sherıf» dep atalady. О́ıtkeni bul kólikke ornatylǵan aqyldy kamera jyldamdyq asyrǵan, aıyppul tólemegen, izdeýde júrgen, tehnıkalyq baıqaýdan ótpegen, saqtandyrylmaǵan kólikterdi birden anyqtaıdy. Internetti qajet etpeıdi. О́zi anyqtaǵan málimetti arnaıy ortalyqqa avtomatty túrde joldaı beredi eken.
«Búgin bizdiń qos patrýldik polısııa batalonynyń jeke quramy qyzmettik kólikpen tolyq jabdyqtaldy. Bıyl 3 dana «kıber-sherıf» jabdyǵyn iske qossaq, aldaǵy jyly taǵy 17 danasyn satyp alý josparda tur. Bıyldyń ózinde jyl basynan beri 1 mlrd teńgeden astam aıyppul bıýdjetke óndirildi», deıdi A.Orazalıev.
«Kıber-sherıfter» negizinen respýblıkalyq jáne oblystyq mańyzy bar tasjol boıynda júrmek.
О́tken qarasha aıynda Aqsaı qalasyndaǵy beınebaqylaý kameralary iske qosylǵan bolatyn. Sodan beri az ýaqyt ishinde 1 700 quqyq buzýshylyq oqıǵasy anyqtalyp, 43 mln teńge aıyppul salynǵan.
Batys Qazaqstan oblysy
