Kóshe sypyryp, qalanyń tazalyǵy úshin tynym tappaıtyn jumysshylarǵa О́skemen qalasynyń eriktileri tórtinshi kún qatarynan ystyq shaı, dámdi toqash taratyp júr. «Jylýlyq syıla» aksııasy aıasyndaǵy is-sharaǵa О́skemen qalalyq volonterler ortalyǵynyń jastary qulshyna kirisken. Qaqaǵan aıazda qoldan kúrek túspeı, qalanyń túkpir-túkpirindegi qar men qoqysty tazalaý ońaı sharýa emes. Osyndaıda ystyq shaıdan asqan ne bar?! Jumysshylarǵa býyn burqyratyp shaı taratyp júrgen jastarǵa qaraǵan qala jurtshylyǵy da rıza.
– Kúnniń aıazyna qaramastan qalamyzdy tazalap júrgen kommýnaldyq qyzmetkerlerge alǵysymyzdy bildiremiz! Keı-keıde jumys kabıneti sýyp ketip jatsa, qosymsha jylytqysh qosyp máre-sáre bolyp jatamyz. Al bul kisiler saǵattap dalada júredi. Ásirese bet qarıtyn aıazdy kúnderi qıyn. Sondyqtan da qala jastary jylýlyq syılaıyq dep, ystyq shaı taratyp júr, – deıdi О́skemen qalasy ákimdiginiń Jastar resýrstyq ortalyǵynyń dırektory Baqytjan Erbolqyzy.
Qala eriktileriniń jyl on eki aı atqaryp júrgen sharýalary az emes. Al bul jolǵy aksııalary shynymen de jylýlyq syılaıdy. Kommýnaldyq qyzmetkerlerge ǵana emes, kórgen kózge de jylý uıalatatyndaı. Aıtqandaı, Shyǵysta aptalap turǵan aıazdyń beti qaıtar emes. Mektep oqýshylary qashyqtyqtan oqýǵa kóship, birqatar qaýipsizdik sharasy da qolǵa alynǵan.
О́SKEMEN
