Erjan Berikuly memleketten alǵan qarjyǵa kútimi jaqsy kóne avtobýs satyp alyp, ony tórt adamdyq monshaǵa aınaldyrǵan. Jyljymaly monsha barynsha qaýipsiz ári jýynýǵa da yńǵaıly.
«Bul kópten oıymda júrgen is edi. Mine, endi sonyń sáti túsip, memlekettik baǵdarlamanyń kómegimen jeke kásibimdi bastadym. Qaıtarymsyz qarjyǵa avtobýs, 220 volttyq elektr qýatyn beretin qozǵaltqysh, pesh tárizdi qajetti dúnıelerdi satyp aldym. Avtobýstyń ishin jylý ustaǵysh materıalmen qaptadym. Nátıjesinde, monsham qaqaǵan aıazdy kúnderi de qaınap turatyn boldy. Qyzmetim qymbat emes, qaltaǵa kúsh túsirmeıdi, tutynýshylarym da dán rıza. Osy kásibimdi bastaýyma sep bolǵan úkimetimizge zor rızashylyǵymdy bildiremin. Keıde balyqshylar, tabıǵat aıasynda demalyp jatqandar, qashyqta turatyn sharýalar, pishenshiler men malshylar, keıde shalǵaıdaǵy shaǵyn aýyldar shaqyrady. Shaqyrǵan jerde sý bolsa boldy, arnaıy sorǵyshpen sý soryp, monshanyń bóshkesin tolytyryp alamyn. Kóp uzamaı monsha da daıyn bolady», deıdi kásipker.
Avtomonshanyń shaı iship demalýǵa arnalǵan jeke bólmesi, býhanasy, dýshy, tońazytqyshy bar. Tipti qaıyń sypyrǵysh, býhanaǵa kıetin baskıim, qolǵap, tápishke sekildi monshaǵa túsýge qajet dúnıeler de tabylady.
Qostanaı oblysy
