Sýretti túsirgen – Erlan OMAR, «EQ»
«Daryn» syılyǵy 1992 jyldan bastap daryndy jastardy ǵylymı, shyǵarmashylyq jáne sporttaǵy joǵary jetistikteri úshin memlekettik qoldaý maqsatynda taǵaıyndalǵan. Ár jyldary túrli saladaǵy 320-dan asa azamat atalǵan syılyqty ıelendi. Saltanatty rásimde Aıda Balaeva memlekettik deńgeıdegi bul marapattyń mańyzy erek, jigerli, asqaq rýhty jastarǵa kórsetilgen zor qurmet ekenin atap ótti.
«Daryn» – tarıhy da, dástúri de qalyptasqan, osy ýaqytqa deıin júzdegen talantty jastyń shyǵarmashylyq jolyn ashqan erekshe syılyq. Olardyń ishinde áıgili sportshylarymyz Olga Shıshıgına, Denıs Ten, Dınara Sádýaqasova, búginde mádenıet qaıratkerleri atanǵan Dımash Qudaıbergen, Marııa Mýdrıak, «Mýz ART» jáne «Ulytaý» toptary, jas ǵylymdar Maksım Zdoroves, Maqsat Jabaǵın, osy kúni jýrnalıstıka maıtalmandaryna aınalǵan Gúlnáz Álimgereı, Maqpal Jumabaı, Irına Ten syndy daryndar bar. Árıne, óner-bilim – adamnyń talabynan týsa, onyń ishki tálimi men mádenıeti – tulǵanyń zııaly sanasy men ulttyń sapasynan. Sondyqtan da Prezıdent Qasym-Jomart Toqaev zııaly, ıntellektýaldy ult týraly aıtqanda, eń aldymen, onyń negizin quraýshy – ónerli de bilimpaz jas qana emes, tereń sanaly, rýhanı sapaly jandar týraly aıtady. Memleket basshysynyń keıingi jyldary júrgizip jatqan aýqymdy reformalary da osyndaı jastarymyzdyń erteńi úshin jasalyp jatyr. Bolashaq Qazaqstannyń álemdik arenada shyn máninde órkenıetti, zııaly da zaıyrly, ozyq oıly bolýynyń birden-bir kepili de osy. Onyń negizinde qarapaıym, biraq óte maǵynaly bes talap jatyr: bilim, eńbekqorlyq, adaldyq, jaýapkershilik jáne kásipqoılyq. Bul qasıetterdiń barlyǵy «Daryn» syılyǵynyń ıegerlerine tán, ósip kele jatqan jastarǵa úlken ónege. Bir ǵana Dımash Qudaıbergenniń mysalynda Otanymyzdy, onyń mádenıeti men tilin tórtkúl dúnıege pash etip júrgen ónerpazdy ǵana emes, ishki parasaty zor, adamı tálimi úlgi, jany meıirban azamatty kóremiz. Sóz joq, bul jastarǵa durys baǵyt kórsetetin ónegeli jol», dedi mınıstr.
Bıylǵy «Darynda» birqatar ózgeris boldy. Úmitkerler jasy 35-ke deıin ulǵaıtyldy. «Qoǵamdyq qyzmet» atalymy «Kreatıvti bastamalar» dep ózgertildi. Atalym kreatıvti ındýstrııa salasyn damytýǵa memleket tarapynan erekshe nazar aýdarýǵa baılanysty ózgeriske tústi. Osy baǵytty yntalandyrý óńirlerdegi bastamalarǵa júıeli túrde nazar aýdarýǵa, túrli jobalardy anyqtaýǵa jáne olardy kótermeleýge, eń úzdik ıdeıalardy iske asyrýǵa múmkindik beredi.
Túsken ótinimniń sany jyldaǵydan 50 paıyzǵa kóp. 340-qa jýyq jastyń jumysy 10 nomınasııa boıynsha sarapqa salyndy. Olarǵa qoǵam qaıratkerleri men salada aıshyqty orny bar tulǵalar qazylyq etti. Nátıjesinde, 19 jastyń juldyzy janyp, abyroıy asqaqtady. Jeńimpazdarǵa «Daryn memlekettik jastar syılyǵynyń laýreaty» ataǵy jáne dıplom, tósbelgi men aqshalaı syılyq tabystaldy. Jemisti ǵylymı, shyǵarmashylyq, qoǵamdyq qyzmeti, sondaı-aq joǵary sporttyq jetistikteri úshin: «Ǵylym» atalymy boıynsha Inesh Kenjına, Elbek О́tepov, «Estrada» atalymy boıynsha Aızada Abdyqalyqova, Tolǵanaı Pazylaqyn, «Klassıkalyq mýzyka» atalymy boıynsha Aıgerim Amanjolova, Aqbıke Alǵı, «Halyq shyǵarmashylyǵy» atalymy boıynsha Bolat Doldashev, Bekbolat Ábdiberikuly, «Dızaın jáne beıneleý óneri» atalymy boıynsha Damır Kasıanov, Saltanat Japarova, «Jýrnalıstıka» atalymy boıynsha Aqerke Bektas, «Kreatıvti bastamalar» atalymy boıynsha Ádilhan Qopabaev, Aıbek Qýatbaev, «Sport» atalymy Rızabek Aıtmuhan, Jibek Qulymbetova, «Ádebıet» atalymy boıynsha Baqytbek Qadyr, Meıirjan Jylqybaı, «Teatr jáne kıno» atalymy boıynsha Erkinbek Ptyralıev, Farhad Býlatov 2023 jylǵy «Daryn» memlekettik jastar syılyǵynyń laýreattary atandy.
Marapattalǵandar arasynda el gazeti «Egemen Qazaqstan» tilshisi, jas jazýshy Baqytbek Qadyr da bar. Baqytbek jazý sheberligi qalyptasqan, kórkem shyǵarmashylyq áleminde óz qoltańbasyn tanytyp úlgergen qalamger, «Jasyl shatyrlar» atty ádebı shyǵarmalar jınaǵy jaryq kórgen.
