Foto: ashyq derekkóz
Baıqaýǵa elimizdiń ár óńirinen muǵalimder qatysyp, gýmanıtarlyq, jaratylystaný jáne tehnıkalyq pánder boıynsha qysqa formattaǵy beınerolıkterin jarııalady. Qatysýshylar jobanyń resmı heshtegterin #Qazaqstanmuǵalimderi men #ÝchıtelıaKazahstana paıdalandy, sonyń arqasynda qaralym sany 800 mıllıonnan asyp túsken.
Muǵalimderdiń TikTok-taǵy beınerolıkteri sarapqa túsip, jekeleı atalym boıynsha úzdikter anyqtaldy.
«TıkTok muǵalimi 2023»
Bul sanatta belgili bir pán boıynsha aqparat naqty jáne kreatıvti kórsetilgen beınerolık baǵalandy. Atalym jeńimpazy - Almatydaǵy fızıka pániniń muǵalimi Haıdar Mýrzahmetov. Ol qazaq tobynyń tanymal ánin oryndap, belgili fızık Isaak Nıýton men onyń zańdaryna arnap beınebaıan túsirgen. Haıdar TikTok-ty fızıka syndy kúrdeli pándi de jalyqtyrmaı, shyǵarmashylyq turǵyda kórsetýge bolatyn edutainment-formaty úshin minsiz platforma ekenin taǵy da dáleldedi.
«TıkTok oqytýshysy 2023»
Bul nomınasııa boıynsha ýnıversıtet oqytýshylary arasynan eń kreatıvti beınerolık usynǵan avtor jeńimpaz atandy. Jeńisti almatylyq robototehnıka pániniń muǵalimi Hamza Dáýletbek ıelendi. Ol eki mınýttyq beınerolıkte Arduino platformasynda robotty óz betinshe qurastyrý jolyn anyq túsindire aldy.
«Muǵalim-jańalyq»
Baıqaý aıasynda jasalǵan beınerolıkteri eń kóp qaralǵan muǵalim «Jańalyq» dep esepteldi. Beınebaıandary 8 mıllıonnan astam qaralym jınaǵan Jetisý oblysy, Alakól aýdany, Dostyq aýylynyń turǵyny, orys tili men ádebıeti pániniń muǵalimi Botagóz Omarova jeńimpaz atandy. Onyń erejelerdi qarapaıym túrde túsindirgen pozıtıvti beınebaıany qazirdiń ózinde 3 mıllıonnan astam ret qaraldy.
«Úzdik beınerolık»
Bul nomınasııada TikTok-ta eń kóp qaralǵan tanymdyq beınerolıktiń avtory Igor Gnoev jeńimpaz atandy. Onyń logıkalyq jumbaq týraly túsirgen beınerolıgi 5 mıllıon qaralym jınaǵan.
Oqý-aǵartý mınıstrligi baıqaýdyń jeńimpazdaryna iPhone 15 Pro Max smartfondaryn tabystaıdy. Baǵaly syılyq muǵalimderge mıllıondaǵan TikTok qoldanýshylary úshin budan da sapaly beınerolıkter túsirýge múmkindik bermek.
«TikTok-pen birge júzege asyrylǵan jobamyzdyń arqasynda elimizdegi pedagogter jastarmen, túrli býyndaǵy ınternet qoldanyshýlarymen birge óz bilimderin shyǵarmashylyq turǵyda ári qyzyqty úlgide bólisý múmkindigin aldy. Ustazdardyń da shet qalmaı, ınternet platformalaryn ıgilikke paıdalanyp, ǵylym men mektep pánderin keńinen nasıhattaýy qýantady. #Qazaqstanmuǵalimderi bastamasynyń maqsaty – pedagogterdi oqytýdyń jańa shyǵarmashylyq ádisterin ashýǵa shabyttandyrý, sabaq oqytý qyzyqty ári tartymdy ekenin kórsetý jáne elimizdegi bilim berý mazmunyna qyzyǵýshylyqty arttyrý», dep túsindirdi QR Oqý-aǵartý mınıstrliginiń baspasóz hatshysy Mereke Amangeldiqyzy.
