Desek te osy shekteýlerge álemniń birqatar memleketi qanaǵattanbaı otyr. Qazirgi kezde olar HOK-qa óz narazylyǵyn bildirip jatyr. Máselen, Reseıdi basqynshy dep aıyptap otyrǵan Ýkraına atalǵan eldi Olımpııa oıyndarynan múlde shettetý qajettigin alǵa tartady. Jýyrda Jastar isi men sport mınıstriniń mindetin atqarýshy Matveı Bıdnyı BAQ ókilderine bergen suhbatynda HOK-tyń tarapynan Reseıge «tym jeńil» jaza qoldanylǵanyna ókinish bildirdi. Kıevtiń ustanymyn eń birinshi bolyp Latvııa qoldady. Atalǵan memlekettiń prezıdenti Edgars Rınkevıchstiń pikiri de osyǵan saıady. Osyndaı ustanymdy Baltyq jaǵalaýyndaǵy Lıtva men Estonııa, basqa da birqatar memleket qoldap otyr. Biraq endi HOK-tyń sheshimin ózgerte qoımaıtyny anyq.
Jalpy, jazǵy Olımpııa oıyndarynyń tarıhynda joǵarydaǵydaı oqıǵalar ara-tura oryn alǵan. Máselen, I dúnıejúzilik soǵysty bastaǵan Germanııa men onyń odaqtastary – Aýstrııa, Majarstan, Bolgarııa jáne Túrkııa 1920 jyly Antverpende alaýy tutanǵan Olımpııa oıyndarynan shettetildi. KSRO-ǵa da sondaı shekteý qoıyldy. II dúnıejúzilik soǵystyń otyn órshitip, aqyrynda kúıreı jeńilgen Germanııa men Japonııa 1948 jyly Londondaǵy oıyndardan shettetilip qana qoımaı, HOK-tyń qatarynan shyǵaryldy.
1956 jyly Melbýrn olımpıadasyna Taıpeıdiń qatysýyna ruqsat berilgenine narazy bolǵan Qytaı jasyl qurlyqqa sapar shegýden úzildi-kesildi bas tartty. Joǵarydaǵy jaǵdaıdy jeleý etken qytaı eliniń ókilderi 1960, 1964, 1968, 1972 jyldardaǵy jarystarda da boı kórsetpedi. Jalpy, Aýstralııadaǵy Olımpıadaǵa taǵy jeti memlekettiń sporttyq delegasııalary kelgen joq. Atap aıtsaq, Mysyr, Irak jáne Lıvan Sýes qaqtyǵysyna baılanysty osyndaı qadamǵa bardy. Sol kezde Ulybrıtanııa, Fransııa jáne Izraıl áskerleri Mysyr menshigindegi Sınaı túbegin basyp alǵan edi. Al Shveısarııa, Ispanııa, Nıderland jáne Lıhtenshteın keńes odaǵy qarýly kúshteriniń Majarstandaǵy tolqýdy basyp-janshyp, beıbit turǵyndardy qynadaı qyrǵanyn aıyptady.
1964 jyly Tokıoda jalaýy jelbiregen jarysqa Ońtústik Afrıka Respýblıkasy (OAR), Indonezııa, Soltústik Koreıanyń sportshylary kelmedi. Ol jerde de túrli saıası jáne násildik másele týyndady. 1976 jyly Monrealǵa Afrıkanyń 20 memleketi barmady. Olar Jańa Zelandııanyń Olımpıadada óner kórsetýine qarsy boldy. Sebebi araldyqtar sonyń aldynda ǵana aparteıd rejimi beleń alǵan OAR-ǵa ózderiniń regbıshiler komandasyn jiberip, birneshe joldastyq kezdesý ótkizdi. Qara qurlyq ókilderin Irak pen Gaıana da qoldady.
1979 jyly KSRO áskeri Aýǵanstanǵa basa-kóktep kirip, sol elde kommýnıstik rejim ornatqany belgili. Keńes odaǵynyń basqynshylyq áreketin aıyptaǵan AQSh bastaǵan barlyǵy 65 memleket 1980 jyly Máskeýde alaýy tutanǵan Olımpııa oıyndaryna boıkot jarııalady. 1984 jylǵy baıraqty báseke Los-Andjeleste uıymdastyryldy. Oǵan KSRO bastaǵan sosıalıstik baǵyttaǵy birneshe el qatysqan joq. 1988 jyly Seýlge Soltústik Koreıa quramasy kelmedi. Bul baýyrlas qos memlekettiń arasyndaǵy uzaq jylǵy kıkiljińniń saldary edi. Olardy Kýba men Efıopııa qoldady.
1992 jyly Barselonadaǵy básekede buryndary KSRO quramynda bolǵan 12 memleketten (Baltyq jaǵalaýy elderinen basqalary) bólek, Iýgoslavııa men Makedonııa HOK týy astynda óner kórsetti. 2016 jyly Rıo-de-Janeıroda Ońtústik Sýdan, Kýveıt, Sırııa, Kongo jáne Efıopııa quramalary bosqyndar komandasy retinde kúsh synasty.
Osylaısha, saıasattyń salqyny sportqa tıip jatyr. Bul jaǵdaı buryn da bolǵan, qazir de solaı. Al sodan keıin «Sport saıasattan tys» dep aıtyp kórińiz...
