Foto: Turizm_jane_sport_ministrligi
«Bıyl Almatydaǵy Alataý, Zerdeli jáne Jas Qanat yqsham aýdandarynda 3 dene shynyqtyrý-saýyqtyrý kesheniniń qurylysy aıaqtaldy. Sondaı-aq Aqjar, Shuǵyla, Saıaly yqsham aýdandarynda jáne Avıator stadıonynda taǵy 4 dene shynyqtyrý-saýyqtyrý kesheniniń, Nurkent yqsham aýdanynda 5000 oryndyq jeńil atletıka manejiniń jobalaý-smetalyq qujattamasyn ázirleý bastaldy. Sonymen qatar Ortalyq stadıon jáne bıik taýly «Medeý» sport kesheni jańǵyrtylady. Jalpy bolashaqta 2025 jylǵa deıin 9 dene shynyqtyrý-saýyqtyrý keshenin, 3 muz aıdynyn, jeńil atletıka manejin jáne gımnastıkaǵa arnalǵan manej salý josparlanǵan. Osy sharalardyń barlyǵy sport alańdaryn 100 myń sharshy metrge deıin ulǵaıtýǵa jáne táýligine 10 myń adamǵa deıin qamtýǵa múmkindik beretinin» aıtty mınıstr.
Memleket basshysynyń tapsyrmasyna sáıkes óskeleń urpaqtyń sporttyq áleýetin damytýǵa basymdyq beriledi. Osyǵan baılanysty mınıstrlik memlekettiń sporttyq tapsyrysyn iske asyrý boıynsha Almaty qalasynda 31 myńǵa jýyq bala men jasóspirim tegin sport seksııalarymen qamtamasyz etilgen.
«Almaty – dúnıejúzilik dodalarda el mereıin asyrǵan dańqty sportshylar mekeni. Baqyt Sársekbaev, Aleksandr Parygın, Baqtııar Ibraev, Olga Shıshıgına, Denıs Ten, Dmıtrıı Balandın, Jansaıa Ábdimálik jáne «Qaırat» fýtzal klýbynyń sportshylaryn atap ótýge bolady. Jalpy alǵanda, Almaty qalasy sportshylarynyń áleýeti zor. Qazirgi tańda ulttyq quramada 1 200-ge jýyq almatylyq sportshy bar. Bul – negizgi quramnyń basym bóligin quraıdy. Sáıkesinshe elimizdiń táýelsizdik jyldarynda Almaty Olımpıadaǵa qatysqan 56 sportshyny daıyndap shyǵarǵan. Sonymen qatar bıylǵy respýblıkalyq jazǵy Spartakıadada Almaty qalasy jalpykomandalyq esepte 1-orynǵa ıe boldy. Komanda qorjynynda 84 altyn, 71 kúmis, 74 qola bar. Qytaıdaǵy Azııa oıyndarynda Almaty qalasynyń sportshylary 1 altyn, 3 kúmis jáne 9 qola júlde jeńip aldy», dedi Ermek Marjyqpaev.
