BALALAR MEN ERESEKTER DOSTYǴY

“Nur Otan” HDP Kókshetaý qalalyq partııa uıymynda 33 bastaýysh qurylym bar. Bulardyń barlyǵy da halyq aldynda aıta qalarlyqtaı bedelge ıe. Ásirese, “Qazaqstan temir joly” AQ Aqmola oblystyq fılıalyndaǵy uıymnyń atyna jyly lebizder jıi aıtylady. – Alǵashynda altaý edik, qazir qatarymyzda 215 belsendi múshe bar, – deıdi bastaýysh partııa uıy­mynyń tóraıymy Roza Súleıme­no­va. – Olardyń barlyǵy qoǵamdyq jumysqa júrek qalaýymen ara­l­a­­satyn, eldiń birligi men abyroıyn, bolashaǵyn oılaıtyn izgi nıettegi jandar. Maǵan áriptesterimniń qoǵamdyq ómirdegi sony ózgerister men jasampazdyq qadamdarǵa beıjaı qaramaıtyndyǵy, ózderi de damý úrdisterimizge bilek sybana kirisetindigi unaıdy. Osydan jeti jyl burynǵy keńeıtilgen máji­li­si­mizde partııa músheleri “Sandyq­taý” balalar úıin qamqorlyqqa alý jóninde bastama kótergen bolatyn. Qazir balalarmen aramyzdaǵy tú­sinistik berik dostyqqa, baýyrmal­dyq qatynasqa ulasyp otyr. Onysy ras jýyrda “Nur Otan” HDP bastaýysh uıymynyń San­dyq­taý balalar úıine kezekti qaıy­rym­dylyq saparyna biz de kýá bol­ǵanbyz. Oǵan partııanyń ob­lystyq fılıaly tóraǵasynyń bi­rin­shi orynbasary Ǵalym Shoıkın bastaǵan beldi azamattar da qa­tysty. Sodaǵy úsh pen on segiz jas aralyǵyndaǵy júz elý eki balanyń júzindegi qýanyshty kórseńiz! Árı­ne balalar álemine bazarlyqsyz barýǵa bola ma?! Qonaqtardyń bul jolǵy qorjyny aýyrlaý kórindi. Kókshetaýlyq temirjolshylar bıylǵy Naýryz meıramyndaǵy qalalyq baıqaýda jeńimpaz atanyp, júldege zamanalyq teledıdardy jeńip alǵan edi. Mine, sol qımas báıgeniń bási balalarǵa baılandy. Bastaýysh partııa uıymy Kókshetaý qalalyq fılıalymen birlesip, ózin-ózi basqarý qurylymdaryn uı­ym­dastyrǵany esimizde. Búgin San­dyqtaý balalar úıindegi “Bir­lik” mektep balalary respýblıka­sy­nyń jyldyq jumys qorytyn­dy­sy shyǵa­rylyp, shaǵyn memle­ket­tiń “mınıstrleri” Temirlan Sár­sen­baev, Elena Bestikbaeva, Aleksandr Zaharchenko, Iýrıı Er­mıt, Lıýdmıla Onop marapattaldy. Sondaı-aq, “Aqmolanyń balǵyn daryndary” baıqaýynyń jeńim­paz­da­ry Ivan Karmanov, Olesıa Ja­qypova, Eka­te­rına Drozdeskaıa jáne Delfıılik oıyndardyń qola júldegeri Sanjar Rydýn qurmet gramotalarymen atap ótildi. Ar­naıy jobany uıymdas­ty­rýshylar eshkimdi de syı-sııapatsyz qaldyr­ǵan joq. Balǵyndardyń bar­lyǵyna oı-óristi keńitetin oıyn­dar, oı­ynshyqtar, kıim-keshekter tartý etildi. Al, oqý quraldary “Mek­­tep­ke jol” dástúrli aksııasy aıasynda berilmek. Roza Arystanqyzy Aqmola temir jol bólimshesiniń bastyǵy Vıacheslav Mıronovtyń arnaıy buı­ryǵyn oqyǵanda balalar máz-meıram boldy. Qýanatyndaı-aq jaǵdaı eken. Mektepti bıyl bi­tiretin jeti túlek temirjol júıesi boıynsha tegin oqytylyp, ony bitirgen soń jumysqa ornalas­ty­rylady. Olardy jyl saıyn mektep “mınıstrleri” iriktep, usynys jasap otyrmaq. Sondaı-aq, “Nur Otan” partııasynyń usynysymen temir jol bóliminiń basshylyǵy balalar úıiniń basqa da muqtajyna jyl saıyn 300 myń teńge qarjy aýdarýǵa sheshim qabyldaýy ózgelerge úlgi bolarlyqtaı qadam. Balalar úıiniń dırektory Me­reke Moldahmetov óz áriptesterine rıza sezimin bildirip, “Nur Otan” HDP oblystyq fılıaly Aqmola óńirindegi alty balalar úıine túgel qamqorlyq jasap otyrǵanyn atap ótti. San­dyqtaýda jýyrda ǵana ót­ken oblystyq spartakıadaǵa nur­­­­­otan­­dyqtardyń kómek-qoldaýy orasan. ... Osy arada, taqyrypty to­lyq­tyrý maqsatynda, Sandyqtaý aý­danynyń ákimi, partııanyń aý­dan­dyq fılıalynyń tóraǵasy Qa­nat Súıindikov pen oblystyq “Úmit” qorynyń dırektory Abzal Ba­­sharov sol kúni aýdan ortalyǵy Bal­qashyn aýylynyń 17 múmkindigi shekteýli balasyna aqshalaı jáne qundy syılyqtar tabys etkenin qosyp aıtqymyz keledi. Baqbergen AMALBEK, Aqmola oblysy,  Sandyqtaý aýdany. KELIŃDER, STRITBOL OINAIYQ BÁRIMIZ!.. Oblys ortalyǵynda jyl saıyn qa­lyń jurtshylyqtyń, jastar men jas­óspirimderdiń qoldaýyna ıe bolǵan ár­túr­li sport oıyndary ótkizilip turady. Dál búgin, bastalǵan jaz aıynyń alǵash­qy kúnderi qalalyq demalys saıabaǵynda IV Halyqtyń sport oıyndary saltanat­ty jaǵdaıda ashyldy. Sport oıyndary merekesine aýyl­dardan jınalǵan jastardy oblystyq dene shynyqtyrý jáne sport basqar­ma­sy bastyǵynyń orynbasary Ardaq Tor­syqbaev quttyqtap, aldaǵy oıyndarynda jeńimpaz atanýlaryna sáttilik tiledi. Ardaq Qaıyrlyulynyń aıtýynsha, eli­mizdiń Prezıdenti Nursultan Nazarbaev­tyń júldesi úshin ótkizilip jatqan ha­lyqtyq sporttyq oıyndarǵa oblystyń aýdan, aýyldarynan kelgen 120 sportshy jas qatysýda. Bizdiń halyqtyq sport oı­yndaryn ótkizýdegi maqsatymyz el ishin­de, ásirese, aýyl jastary arasynda bu­qa­ra­lyq sportty damytý, salamatty ómir saltyn qa­lyptastyrý bolyp tabylady. Úsh kún boıy, osy saıabaqta strıtbol oıynynan jarys ótedi. Jarys jeńimpazy shilde aıynda Oral qala­synda ótetin respýblıkalyq jarysqa qatysýǵa joldama alady. Strıtbol basketbol oıyny sııaqty, bir erek­sheligi munda dopty bir dóńgelekke túsiredi, kóp oryn kerek etpeıdi, oınaýǵa yńǵaıly qarapaıym oıyn, aýlada, esik aldynda oınaı berýge bolady. Bul – strıtbolshy aýyl jastarynyń da qatary kóbeıip keledi degen sóz. Komanda tórt adamnan jasaqtalady. Qyzdar jáne uldar bolyp oınaı beredi. Árıne, árkim óz komandasy úshin. Olar jyl saıyn osy oıyndy oınap jattyǵyp qalǵandaryn aıtady. Biz oıyn bastalmas buryn strıtbolshy aýyl jastarymen áńgimelestik. Oblystaǵy Jelezınka aýdanynan kelgen Aleksandr Býnderlıht, Pavlodar aýdanynan apaly-sińlili Vera jáne Valıa Zlobınalar, Mak­sım Sagaı­dak, Ásel Muhtarova, Anas­tasııa Marty­nova, Erlan Aıtýǵanov strıt­bol bizder úshin shynynda naǵyz sport oıyny, biz jattyǵamyz, shynyǵa­myz, kúshtimiz, eptimiz, biz bárimiz dos­pyz, óıtkeni, ko­man­damyzda ártúrli ult ókilderiniń ba­lalary bar, bir-birimizdi sport tilimen uǵynyp, jyl saıyn osy oıynda bas qosyp, bir demalyp qala­myz. Oblys ortalyǵyna kelgenge deıin bi­raz ýaqyt daıyndaldyq. Jeńiske je­tip, júldeli bolǵymyz keledi. Sport bas­qarmasyn­daǵy aǵa-apaılar bolsyn, aý­ylda bol­syn bizderdi “strıtbolshylar” dep ataıtyny unaıdy, deıdi. Olardyń sport kıimderi de ózderine jarasyp, sán berip tur. Aýyldarynda strıtbol oınaıtyn dostary kóbeıip keledi eken. Sondyqtan olar aýyl jáne qala jastaryn osy bir ǵajaıyp oıyndy ózderimen birge oınaýǵa shaqyrady. Sóıtip, strıtbolshylar saıabaq ishin­de jarysty bastap ketti. Jazǵy kanıýl kezi.Baq ishinde balmuzdaqtan buryn oıyndy qyzyqtaǵan balalar, jastar kóp. Jankúıerler daýystary da shyǵyp jatyr. Sporttyq áýender estiledi. Jazǵy saıabaqta kishigirim olıpıada oıyndary ótip jatqandaı áser alasyń. Farıda BYQAI, PAVLODAR. ORTAQ MAQSAT JOLYNDA Elimizdiń óńirlerinde mazmuny ártúrli bolǵanymen, birligimiz jarassa bárimiz de jaqsy ómir súremiz degen maqsat biriktirgen ortaq sharalar úderisteri jalǵasýda. Qostanaı. Ult ustazy Ahmet Baıtursynov atyndaǵy alańda qalanyń aýlalyq klýbtarynyń tárbıelenýshileri men kásibı sheberlerdiń qatysýymen art-festıvalder ótkizildi. Bul Qos­tanaıdaǵy bas alańdy shat­tyqqa bólegen sáýleli sharaǵa aınaldy. Saǵat 11.00-de ulty­myzdyń ekinshi ustazy Ybyraı Altynsarın kesenesiniń ma­ńaı­yn abattandyrý men sáýletten­dirýge arnalǵan túrli qoǵamdyq birlestikter men mádenıet mekemeleri qyzmetkerleriniń aksııasy bastaldy. Saǵat 13.00-de balalar baq­shalarynyń tárbıeshileri men Rýdnyı qalasyndaǵy qurylys­shy­lar daıyndaıtyn 5-shi lı­seıdiń oqýshylary kásipker­ler­­­diń kómegimen balalar ala­ńyn ashty. Sondaı-aq osy jerde qalanyń bóbekterine as­tyqtyń qalaı ósip, jetiletinin kórsetýge arnalǵan aýyl sharýa­shylyǵy kórmesi uıymdasty­ryl­dy. Barlyq sharalardyń qatysýshylary da: “Biz bir komandamyz, birligimiz jarassa bárin de jeńemiz!” degen uran­dardy qaıtalaýmen boldy. Bul aksııalar Qazaqstannyń Azamattyq alıansynyń “Birli­gimiz jarasqan!” jáne “Biz – bir komandamyz” atty áleý­mettik aqparattyq naýqanynyń sheńberinde ótkizildi. Jalpy, elimiz boıynsha osy kúnge deı­in osyndaı 25 shara uıymdas­ty­ryl­dy. Sonyń ishinde Temir­taý qalasynda sport alańy qalpyna keltirildi, Pavlodarda “Meıirimdilik mektepteri”, Astanada “Balam-aı”, Almatyda “Estelik vahtasy”, t.b. ótkizildi. Mańǵystaý. Atalǵan oblys­tyń Taýshyq aýylynda da Aza­mattyq Alıanstyń bastam­a­­symen tájirıbeli bıznesmender jas otbasylary úshin sheber-synyptar ótkizdi. “Otbasy bız­nesin qurý – ol óte perspektı­valy is. Biz isti qalaı bastaýdy 12 otbasyna ǵana emes, barlyq otandastarymyzǵa kórsetemiz. Bárimiz ispen aınalyssaq – ta­tý-tátti ómir súrýimiz de jal­ǵasa beretin bolady!” dedi aksııany uıymdastyrýshylar. Sharaǵa qatysýshylar Aıgúl Medımanovanyń tigin atelesi men Medelbaı Arynovtyń ba­lyq sharýashylyǵy kásiporny­na baryp, olardyń bıznes­te­ri­niń júrýimen tanysty. Birli­gimiz jarasyp, bir ispen aına­lyssaq, bárine de qol jetkize alamyz. Tek qajyrlylyq pen nıettestik kerek. Jergilikti bılik bólingen qarajatty qol­daý sharalaryna durys jumsasa boldy, dedi isteri ońǵa basqan bıznesmender. “Egemen aqparat”. “ALTYN JÚREKTIŃ” JYLÝY О́mirde alýan taǵdyrly adamdar kezdesedi. Kim-kim de taǵdyrdyń mań­daıǵa jazylǵanynan qashyp qu­tyla almaıtyny anyq. Árıne, pe­she­nesine múgedektikti dýshar etken­der­diń qıyndyqqa moıymaı, ómirge ińkárligin joǵaltpaýy aınalasyn­daǵy adamdarǵa da, aǵaıyn-týystary men joldas-joralaryna da baı­la­nysty. Basyńa is túskende júreginiń jylýy mol jandardyń qoldaý-kó­megi qanshalyqty kúsh beretinin múm­kindigi shekteýli jandardan artyq kim biledi. Bizdiń qalamyzda da múmkindigi shekteýli kóptegen adamdar tura­dy. Olardy taǵdyr salǵan qıyndyqpen betpe-bet qaldyrmaı, erekshe qam­qorlyqqa alyp júrgen jandar da barshylyq. Olar – osyndaı qamkó­ńil jandardyń ata-analary, jaqyn-jýyqtary, dostary. Keıde ondaı adam­dardyń demalysyn uıym­das­tyratyn, aralasyp kóńilin demeıtin eńbegine eshteńe dámetpeıtin volon­terler de kezdesedi. Aqtóbe qalasynda múmkindigi shek­teýli balalar ósirip otyrǵan ot­basylardy qoldaý maqsatynda osy­men tórtinshi ret “Altyn júrek” fes­tıvali uıymdastyryldy. Múm­kindigi shekteýli balalar jyl saıyn jınalyp, ózderiniń ómirge degen qushtarlyǵyn qanattandyryp júrgen asyl jandarǵa alǵys sezimin bildirýdi dástúrge aınaldyryp keledi. Bul joly olar Retro parkte bas qosty. Qolarbaǵa tańylǵanyna qaramas­tan, azamattyq belsendiligimen kóri­nip, múgedek jandardyń ózekti máse­lelerin sheshýge bastamashy bolyp júrgen Aqtóbe qalalyq sal aýrýla­ry­na shaldyqqan azamattar qoǵamy­nyń tóraıymy Quralaı Báımenova múmkindigi shekteýli balalardyń ómir­ge qushtarlyǵyna tánti ekenin bil­dirdi. Olardyń arasynda “Kógildir qus”, “Eki juldyz” baıqaýlary ót­kizilgenin, olarǵa múmkindigi shekteýli balalardyń belsendilikpen qatysqa­nyn aıtty. Qolarbaǵa tańylǵan Olesıanyń anasy Valentına Baranova Reseıddiń ózinde mundaı qoǵamnyń, volonterlerdiń joqtyǵyn tilge tıek ete kelip, búgingideı kezdesýdi uı­ymdastyryp, jarymjan balalardyń ózara jolyǵysýyna múmkindik týǵyz­ǵandarǵa analyq alǵysyn jetkizdi. Aqtóbe memlekettik pedagogıkalyq ınstıtýtynyń stýdenti Eleonora Bektibaevanyń “D.A.R.” volonterlik klýbyna kelýine dos qyzynyń apatqa ushyrap sal bolyp qalýy sebepshi bo­lypty. Dosyna baryp júrip basqa­larymen de aralasýdy, jolyǵysýdy jón sanaǵan Eleonora Bektibaeva qazir ózine kóp dostar tapqanyna, olardyń aýyrtpalyǵyn sál de bolsa jeńildetkenine qýanyshty. Onyń “D.A.R. “volonterler klýbyna baryp júrgeninine 1,5 jylǵa jýyqtapty. Osyndaı basqosýlarda ómirdiń maǵy­naly jaqtary kóbirek aıtylatyny belgili. Múmkindigi shekteýli jandar bárine de rıza, degenmen, avtokólik pen pantýs máselesi sheshimin tapsa degen tilekteri de joq emes. Festıval aıasynda ótkizilgen sharalardan kóńilderi kóterilip, ózara oı-pikir bólisken qam-kóńil jandar qaıyrymdy zamandastarynyń júrek jylýyn sezinip, bir jasap qaldy. Satybaldy SÁÝIRBAI, Aqtóbe oblysy.