Qazaqstan men Qytaı arasyndaǵy taýar aınalymy rekordtyq kórsetkishke jetti

«Biz Tóraǵa Sı Szınpınmen birge Qazaq­stan men Qytaı arasyndaǵy yntymaq­tastyqtyń jańa «altyn otyz jyl­dyǵyna» qadam bastyq. Men byltyr Qytaıǵa bir emes, eki márte saparmen bardym. Bul – elderimiz arasyndaǵy tyǵyz yqpaldastyqtyń aıqyn dáleli.

Qytaı kóshbasshysymen Sıanda jáne Beıjińde mazmundy kelissózder júrgizip, mańyzdy ýaǵdalastyqtarǵa qol jetkizdik. Ony júzege asyrýdyń naqty joldaryn belgiledik. Osyndaı jeke júzdesýler Astana men Beıjiń­niń baılanystary joǵary deńgeıde ekenin kórsetedi. Búginde qazaq-qytaı qatynastary kópke úlgi bolyp otyr dep senimmen aıta alamyn», dedi Memleket basshysy.

Osy rette Prezıdent eki eldiń ózara taýar aınalymy jyl sanap artyp kele jatqanyn tilge tıek etti.

«О́zara taýar aınalymynyń kólemi 2023 jyldyń 10 aıdaǵy qorytyndysy bo­ıynsha 24,3 mıllıard dollarǵa jetti. Bul – jańa rekord! Qazir eksport­qa shyǵarylatyn otandyq taýar túrlerin kóbeıtip, QHR-ǵa júk ta­sy­malyn arttyrý úshin belsene jumys istep jatyrmyz. Qytaı buryn­nan Qazaqstan ekonomıkasyna mol qarjy quıǵan iri ınvestorlardyń qataryna kiredi. Osy ýaqytqa deıin QHR elimizge 24 mıl­lıard dollar ınvestısııa saldy.

Qytaımen ortaq shekaramyzdyń bolýy, Shyǵys pen Batystyń arasyndaǵy utymdy jerde turǵanymyz Qytaı taýarlaryn túrli baǵytqa Qazaqstan aýmaǵy arqyly tasymaldaýǵa zor múmkindik beredi. О́ıtkeni Beıjińde joǵary deńgeıde ótken «Bir beldeý, bir jol» atty úshinshi forým aıasynda birqatar mańyzdy qujatqa qol qoıyldy. Sonyń ishinen Transkaspıı halyqaralyq kólik dálizin birlese damytý jónindegi kelisimdi jáne «Aıagóz – Tachen» baǵytyndaǵy temir jol qury­ly­sy týraly memorandýmdy atap ótýge bolady. Bul kelisimder elimiz­diń kólik-logıstıka salasyna tyń ser­pin beretinine senimdimin. Qazaqstan Qytaı­­dyń «Bir beldeý, bir jol» mega­joba­­syn tolyǵymen qoldaıdy. Byl­tyr qazan aıynda Beıjińde ótken forýmda sóılegen sózim – osynyń taǵy bir dáleli.

Qazaqstan men Qytaı arasynda vıza­syz júrý rejimi kúshine endi. Mu­nyń máni zor. Endi otandastarymyz kórshi elge emin-erkin baryp, kele alady. Azamattarymyz osy múmkin­dikti ońtaıly paıdalanady dep úmittenemin. Elimizde Qytaıǵa qatysty baıaǵy qasań túsinikterge negizdelgen nemese bizge syrttan tańylǵan jónsiz úreı bolmaýǵa tıis» ekenin eskertti Q.Toqaev.

Bul kúnde Qytaı memleketi damýdyń dańǵyl jolyna túsken, ozyq tehnologııasymen mol tabysqa kenelip otyrǵan memleket ekenin jetkizdi. Shyǵystaǵy kórshimen tatý bolyp, yntymaqty baılanys ornatý elimiz úshin asa mańyzdy qadam ekenin atap ótti.