Foto: TJD
Buǵan deıin Oraldaǵy dámhanada gaz jarylyp, órt shyqqanyn habarlaǵan edik. Oqıǵa saldarynan zardap shekkender men qaza tapqandar týraly aqparat endi málim boldy.
«Qıraǵan úıindiler astynan 6 adam tabylyp, qutqaryldy. Onyń beseýi medısınalyq mekemelerge jetkizildi, 1 adam aýrýhanaǵa jatýdan bas tartty. Oqıǵa ornynda 2 adam qaza tapty. Adamdardyń jeke basy anyqtalyp jatyr. Úıindilerdiń astynda áli de adamdar bolýy múmkin. Avarııalyq-qutqarý jumystary áli de jalǵasady», delingen Batys Qazaqstan oblysy TJD habarlamasynda.
Oqıǵa ornynda Batys Qazaqstan oblysy Tótenshe jaǵdaılar departamenti, polısııa, jergilikti atqarýshy organdar men jedel medısınalyq járdem kúshteri jumyldyrylǵan. Qazir barlyǵy 110-nan asa adam jáne 30 birlik tehnıka jumys istep jatyr.
BQO TJD shtabynda 8 (7112) 55-40-88 nómiri boıynsha jedel jeli jumysy uıymdastyrylǵan.
