Kópten beri shalǵaıdaǵy shaǵyn aýyldyń tútini túzý ushyp, gúldene túsýine kúsh salyp kele jatqan «Syma-K» sharýa qojalyǵy atalǵan medısınalyq pýnktti 22 mln teńgege turǵyzypty. Zaman talabyna saı barynsha jabdyqtalǵan eńseli emdeý mekemesi boı kótergen soń, qııandaǵy Kólqamysty alyssynbaı jas dáriger de kelip jumysyna kirisip ketken. Jas mamannyń baspanasyn, basqa da turmystyq jaǵdaıyn jergilikti sharýa qojalyǵy jasap berip jatyr.
Medısınalyq pýnktte feldsher kabıneti, emdeý jáne egý kabınetteri, jeke sharýashylyq bólmesi bar. Kabınettiń bári jańa jıhazdarmen, qajetti medısınalyq qurylǵylarmen jabdyqtalǵan. Medpýnkttiń janynda jedel járdem kóligin qoıatyn jyly turaǵy da bar.
Aýyl turǵyndaryn quttyqtaı kelgen bılik ókilderi kópshilikke ózderiniń júrekjardy tilekterin arnap, atalǵan sharýa qojalyǵynyń basshysy Manat Kárbozovqa alǵys aıtty.
«Memleket basshysy Qasym-Jomart Toqaev halyqqa Joldaýynda medısınalyq ınfraqurylymdy jaqsartýdyń mańyzdy ekenin atap ótkenin bilesizder. Búgin bárimiz Prezıdent tapsyrmasynyń shalǵaı aýyldarda da iske asyrylyp jatqanyna kýá bolyp otyrmyz. El úshin mańyzy zor mundaı ıgi isti ilgeriletýge memlekettik organdar ǵana emes, sonymen qatar áleýmettik jaýapkershiliktiń ne ekenin jete túsingen jeke kásipkerler de bilek sybana atsalysyp jatqany kóńil qýantady. Kólqamys qana emes, osy tóńirektegi ózge de aýyl, aýyldyq okrýgterdegi sharýa qojalyqtary osyndaı ıgi isterdi qolǵa alsa, nur ústine nur bolar edi», dedi aýdan ákimi Shota Ospanov.
Saltanatty rásimniń sońynda qııandaǵy Kólqamysty toqsanynshy jyldardyń daýylynan aman alyp qalyp, aýyl mektebiniń jabylyp qalmaýyna, jurttyń jyly ornyn tastap qalaǵa qaraı údere kóship ketpeýine jaǵdaı jasaǵan óńirdiń qurmetti aqsaqaly, eńbek ardageri Kákimjan Kárbozov qarııa kópshilikke aq batasyn berip, ózge de eleýli azamattarmen birge medısınalyq pýnktiń lentasyn qıdy.
Aýdan ákimi «Syma-K» sharýa qojalyǵynyń basshysy Manat Kákimjanulyna jáne qurylys jumystaryna atsalysyp, el ıgiligi úshin eńbek etip júrgen birqatar azamatqa alǵyshat pen baǵaly syılyq tapsyrdy.
Qostanaı oblysy
