4 qańtarǵa qaraǵan túni 02:07 saǵat shamasynda Oral qalasy, Syrym Datuly kóshesinde ornalasqan dámhanada gaz jarylǵany týraly habarlandy.
Oqıǵa ornyna qutqarý qyzmeti jedel jetip, zardap shekkenderge kómekke umtyldy. Batys Qazaqstan oblysy Tótenshe jaǵdaılar departamenti, polısııa, jergilikti atqarýshy organdar men jedel medısınalyq járdem kúshteri, barlyǵy 190 adam jáne 50 tehnıka jumyldy. Saǵat 02:40-ta órt sóndirildi. Oblys ákimi Narıman Tóreǵalıev arnaıy kelip, oqıǵanyń barysymen tanysty. Qazirgi ýaqytta jergilikti atqarýshy organdar men tótenshelikter istiń mán-jaıyn anyqtap jatyr.
Aıta keteıik, jarylys bolǵan «Rizyq» dámhanasy eki qabatty, joǵarǵy qabaty temirbeton konstrýksııadan jasalǵan. «Jarylys bolǵanda kafeniń ońtústik qabyrǵasy men tóbesi qulap tústi. 25 sharshy metr aýmaqta órt bolǵan, qutqarýshylar osy jerden eki adamnyń otqa kúıgen máıitin taýyp shyǵardy. 6 adam «Jedel járdem» qyzmetine tapsyrylyp, onyń beseýi aýrýhanaǵa jatqyzyldy. Oqıǵa ornynan 50 lıtrlik gaz balonyn bizdiń qyzmetkerler qaýipsiz jerge shyǵardy», dep habarlady BQO TJ departamentiniń bastyǵy Ernur О́tegenov.
Oqıǵa bolǵan dámhananyń dál irgesindegi 5 qabatty turǵyn úıdiń tereze áınekteri synǵan. «QazTransGaz Aımaq» AQ qoǵammen baılanys departamenti «jarylysqa gaz ballony sebep bolýy múmkin» degen aldyn ala boljam aıtyp otyr.
Qazir jarylys saldarynan zardap shekkenderge tıisti medısınalyq kómek kórsetilip jatyr. Jaraqat alǵan 5 adam Oraldaǵy kópbeıindi qalalyq aýrýhanaǵa jatqyzylǵan. «2 er adam jáne 2 áıel adam jansaqtaý bóliminde. Bir er adam travmatologııa bóliminde», dep habarlady oblys ákimdiginiń baspasóz qyzmeti.
Oblystyq densaýlyq saqtaý basqarmasynyń basshysy Erlan Toqsanovtyń aıtýynsha, jansaqtaý bóliminde jatqan eki er adam – О́zbekstan azamaty, eki qyz bala – óz elimizden. Olar jabyq bas-mı jaraqatyn jáne 15-52 paıyz kúıik jaraqatyn alǵan. «Olardyń jaǵdaıy óte aýyr», dedi Erlan Vılenuly. Bir adam beti men moıyn tusy kúıip, aýrýhananyń jaraqat bólimine jatqyzylǵan. Taǵy bir azamat dárigerdiń tekserýinen keıin ambýlatorııalyq em alý úshin úıine jiberildi.
Tústen keıin qutqarýshylar jarylys bolǵan ǵımarattyń ornyn tazalaý kezinde úıindi astynan taǵy bir adamnyń denesin alyp shyqty. Marqumdardyń kim ekendigin anyqtaý úshin máıitter sot-medısınalyq saraptaý ortalyǵyna jiberildi. Apattyq-qutqarý jumysy sońyna deıin júrgiziledi. Oqıǵa ornyna ıisshil ıtter de ákelingen. Qaza tapqandar men zardap shekkenderdiń týystaryna dárigerlik, psıhologııalyq kómek kórsetilip jatyr.
Batys Qazaqstan oblysynyń ákimi máseleni baqylaýda ustap otyr. Oblystyq Tótenshe jaǵdaı departamentine jáne Densaýlyq saqtaý basqarmasyna tıisti tapsyrma berilgen.
Batys Qazaqstan oblysy
