Qaıta túlegen «Spýtnık»

Osylaısha, Prezıdent Qasym-Jo­mart Toqaevtyń bastamasymen qolǵa alynǵan «Halyq únine qulaq asatyn memleket» tujyrymdamasyn iske asyrý maqsatynda halyqtyń talap-tilegi oryndalyp, birneshe aıdyń kóleminde kishigirim bazardyń ornyna áp-ádemi, erekshe sáýletpen salynǵan gúlzar paıda bolyp, kúni keshe halyq ıgiligine berildi. Shaǵyn saıabaqtyń ashylý saltanatyna qala ákimi Ǵabıt Syzdyqbekov te qatysty. Ol saýda nysandary jaılap alǵan burynǵy gúlzardyń orny qaıtadan jasyl jelekke aınalyp, jaıqalǵan, qulpyrǵan saıabaq bolǵanyna erekshe qýanyshty ekenin jetkizdi.

Al jekeshelendirý kezinde osy jerdi ıelenip ketken kásipkerge qala ákimdigi basqa aýmaqtan jer telimin qarastyrdy. Sonymen birge jer ıesine qosymsha ótemaqylar tólendi. Gúlzardyń aýmaǵy jarty gektar jerdi quraıdy. Ol qala ákimdiginiń qoldaýymen ári demeýshiler esebinen salyndy. Qurylys merzimi bir aı ýaqytty alǵan. Shaǵyn saıabaqta 7 túr­li sándik taldyń júzge jýyq kósheti egildi. Keleshekte saıabaqta qaıyń, akasııa, shynar, emen, talshyn taldary jaıqalyp ósip, adamdarǵa óziniń saıaly kóleńkesin syılaıdy. Qysy-jazy jasyl túsi ózgermegen qylqan japyraqty taldar da saıabaq­tyń sánin ashady. Sonymen birge gúl­zarda haı-tek stılindegi shamdar, kópshilikke arnalyp salynǵan bas­tyrmalar, átkenshekter ornatyldy. Budan bólek, eki myń sharshy metr aıaqjolǵa mármár tastar, dál osyndaı aýmaqqa shym tóseldi. Gúlzar mańyndaǵy kópqabatty úıdiń qaqpasy petroglıftermen árlengen.

Eń bastysy, qalanyń qarapaıym turǵyndary demalys aımaǵynyń boı kótergenine dán rıza. Kún saıyn keshki ýaqytta qydyratyn, demalatyn jer kerek. Ásirese nemeresin jetektegen ata-ájelerge úıiniń janynan oryndyǵy qaz-qatar tizilgen, tal-teregi aınalasyna kóleńkesin túsirgen saıaly oryndardyń bolǵany qajet-aq. Kishkentaı balalar úshin de alysqa uzamaı ata-anasynyń kóz aldynda oınap júrgeni jaqsy. Burynǵy ornynan qaıta ashylǵan «Spýtnık» gúlzary endi halyqtyń sol suranysyn tolyq qanaǵattandyrady.

Aldaǵy ýaqytta da «Halyq qatysa­tyn bıýdjet» baǵdarlamasy boıynsha shahardyń saıabaq qurylysyna yńǵaıly kez kelgen aýmaǵynan tur­ǵyn­­dardyń ótinishi boıynsha gúlzar­lar ashylatyn bolady. Jasyl jelek – qalanyń «ókpesi», sondyqtan saıabaqtyń kóbeı­geni mıllıonnan astam halqy bar mega­po­lıs úshin ekologııalyq basty qajet­tilik bolyp tabylady. Jalpy, «Shym­kent – jasyl qala» degen sóz tirkesi baıaǵydan halyq aýzynda jattalyp qalǵan. Osy uǵymdy shyn máninde júzege asy­rý búgingi qala ákimdiginiń basty stra­tegııalyq josparyna aınalyp otyr.

ShYMKENT