Jarystyń birinshi raketkasy bolyp tirkelgen Jibek Qulambaeva grekııalyq Sapfo Sakellarıdımen birge fınalda taılandtyq Lanlana Tararýdı men taıbeılik Chıa-I Saomen synǵa túsýi kerek edi. Alaıda taılandtyq-taıbeılik jup básekege kelmeı qaldy da, J.Qulambaeva men S.Sakellarıdı oınamastan chempıon atandy. Osylaısha, Jibek Qulambaeva juptyq synda ITF dodasynda jańa jyldaǵy birinshi, sporttyq jolyndaǵy 27-tıtýlyna qol jetkizdi.
Sondaı-aq buǵan deıin taǵy bir otandasymyz Anna Danılına juptyq synda top jardy. Ol slovakııalyq Vıktorııa Grýnchakovamen juptasyp, Aýstralııanyń Oklend qalasynda ótken WTA týrnırinde jeńiske jetti. Olardyń fınaldaǵy qarsylasy amerıkalyq Betanı Mattek-Sands pen chehııalyq Marııa Býzkova boldy. Qorytyndy esep – 6:3, 6:7, 10:8. Danılına úshin bul – juptyq syndaǵy WTA-nyń besinshi tıtýly.
