Qazaqstan Úkimetiniń Astana halyqaralyq áýejaıyn basqarýǵa alǵan sheteldik ınvestorǵa qoıǵan birden-bir mańyzdy mindeti – áýejaıdyń ushý-qoný jolaǵyn jaqyn arada kúrdeli jóndeýden ótkizý bolatyn. Astana halyqaralyq áýejaıynyń áýeaılaǵy salynǵannan beri aǵymdaǵy jóndeý jumystarynan ótip keledi. Elorda áýejaıynyń ushý-qoný jolaǵy sońǵy ret byltyr shilde-tamyz aılarynda kúrdeli jóndeýden ótti.
Kólik vıse-mınıstri Talǵat Lastaevtyń tóraǵalyǵymen ótken jıynda áýejaı basshylary aerodromdy kúrdeli jóndeýge qazirden bastap qyzý daıyndyq júrip jatqanyn aıtty.
«Investorlar jobalyq-smetalyq qujattamany qańtar-aqpan aılarynda taldap, aqpannyń sońy men naýryzdyń basynda merdigerdi anyqtaýdy kózdep otyr. Aldyn ala josparlar boıynsha, merdiger naýryz aıynyń ortasyna deıin Astanada bar kúshin jumyldyrýy kerek. Investorlardyń jospary boıynsha, eger aýa raıy qolaısyzdyq týdyrmasa, sáýir aıynyń basyna qaraı aerodromda kúrdeli jóndeý jumystary bastalýy kerek. Aldyn ala jospar boıynsha kúrdeli jóndeý jumystary 12 aıǵa sozylady. Degenmen, áýejaı kúrdeli jóndeý kezinde jumysyn jalǵastyrady. Ushý men qonýdy tek kúndiz ǵana shekteýge bolady», dep habarlady Kólik mınıstrligi.
