Jańa jyldyń alǵashqy aptasynda «Aýyl Fýtbol» jobasy aıasynda Qarǵaly aýylyndaǵy «BAQSY» saýyqtyrý ortalyǵynda 2012 jyly týǵan balalardan quralǵan Almaty oblysynyń fýtbol quramasynyń oqý-jattyǵý jıyny ótti.
Qurama músheliginde Qarasaı aýdanyna qarasty 9 aýyldyń, atap aıtqanda Abaı, Raıymbek, Qyrǵaýyldy, Ashybulaq, Almaly, Aqsaı, Jambyl jáne Jibek joly aýyly komandalarynan iriktelgen 15 bala bar.
Tabıǵat aıasyndaǵy jattyǵý baǵdarlamasynda kúndelikti eki tehnıkalyq jáne taktıkalyq sabaq, dene shynyqtyrý, teorııalyq sabaqtar, sonymen qatar basseınge, kınoteatrǵa barý jáne bos ýaqytta PlayStation oınaý qamtylǵan. Komandanyń músheleri oıyn jáne jattyǵý kıimderimen, arnaıy sporttyq sómkelermen qamtamasyz etildi. Lagerde kúnine 4 mezgil ystyq tamaq, 2 mezgil jeńil tamaq berilip, balalardyń durys tamaqtanýyna aıryqsha kóńil bólindi. Oqý úderisin kásibı biliktiligi bar 3 jattyqtyrýshy júrgizip, aýyl balalarynyń fýtbol oıynyn jetik meńgerýine yqpal etti. Táýlik boıy balalardyń qaýipsizdigi qadaǵalanyp, medısınalyq kómek kórsetýge tıisti jaǵdaı jasalyndy.
«Osyndaı qamqorlyqqa aýyl balalary da laıyq. Sondyqtan biz eń aldymen aýyl balalaryn sportpen, onyń ishinde fýtbolmen belsendi aınalysýǵa yntalandyrýǵa tyrysamyz. Ekinshiden, mundaı sharalar ata-analardy yntalandyrady. Qolǵa alǵan jumysymyzdyń nátıjesin kórgen olar balalarynyń bos ýaqytyn tıimdi uıymdastyrýǵa belsendi qatysady dep senemiz. Úshinshiden, talantty, úzdik balalardy jigerlendiredi. Bul komandany aýyl balalarynyń arasynan iriktep aldyq. Irikteý ashyq ári ádil ótti. Kásibı jattyqtyrýshynyń pikirin eskerdik. Basty qaǵıdamyz da – osy», deıdi «Aýyl Fýtbol» jobasynyń jetekshisi Serik Mámbetov.
Oqý-jattyǵý jıynyna qatysyp, tájirıbesi shyńdalǵan qurama komanda aldaǵy ýaqytta túrli deńgeıdegi jarystarǵa qatysyp, nátıjeli óner kórsetedi degen úmit bar. Jalpy, memorandým aıasynda 2024 jyldyń qańtar-maýsym aılary aralyǵynda 2012, 2013 jáne 2014 jyly týǵan balalardyń qatysýymen 3 oqý-jattyǵý jıynyn ótkizý josparlanyp otyr.
Eske salsaq, 2023 jyldyń qarasha aıynda «Aýyl Fýtbol» jobasy men «Halyq» qaıyrymdylyq qory arasynda yntymaqtastyq týraly memorandýmǵa qol qoıylǵan edi. Memorandým aıasynda respýblıka kólemindegi aýyldyq eldi mekenderdiń 100 balalar fýtbol komandasyn qajetti qural-jabdyqtarmen qamtý, 100 jattyqtyrýshynyń UEFA-nyń D sanaty boıynsha biliktiligin kóterý jáne oblystyq týrnırler ótkizý josparlanǵan.
2020 jyldyń basynda iske qosylǵan «Aýyl Fýtbol» jobasyn júzege asyrý barysynda 100-den asa komandaǵa qoldaý kórsetildi, 40-tan asa túrli deńgeıdegi týrnırler, 30-dan asa semınarlar men trenıngter, jyl saıynǵy fýtbol demalystary men festıvaldar ótkizilip keledi. Qatysýshy komandalar respýblıkalyq jáne halyqaralyq deńgeıdegi túrli jarystardyń jeńimpazdary men júldegerleri atanǵanyn aıta ketken jón.
Joba Qazaqstan boıynsha 50-den asa komandany jáne 2 myńnan asa balany qamtıdy. Sondaı-aq joba 2024 jyldy «Bilim jyly» dep jarııalady.
Almaty oblysy
