Otandastarymyz oılap tapqan qyzmet kásiporyndarǵa tez arada bilikti qyzmetker tabýǵa kómektesedi. Osylaısha, jumysshylar tapshylyǵy máselesin sheshedi. Al qyzmetkerler ıkemdi keste jáne apta saıynǵy jalaqy tólemderi bar tolyq emes jumys kúnine ıe bolady. Eki jyl ishinde «EasyTap» bıznes-modeli óziniń tıimdiligin dáleldedi. Qazaqstannyń 15 qalasynda kún saıyn qosymshany 150 myńnan astam adam paıdalanady. Platformaǵa 70-ten astam jahandyq jáne otandyq kompanııa qosylǵan. Olardyń ishinde «Small», «Flip.kz», «Magnum Go», «Arbuz», «KFC», «Hardees», «Food Solutions», «Inditex», «Waikiki», «Kari», «Adidas», «Reebok», «Qazaq Republic» dúkenderi jáne taǵy basqalary bar.
– Aldaǵy eki jylǵa arnalǵan startap strategııasynda Ortalyq Azııaǵa shyǵý bar. Qazaqstanda, Qyrǵyzstanda servısti damytyp, ózbek jáne tájik naryǵynda jaqsy jetistikke jetkimiz keledi. Osy naryqtardyń barlyǵyna biz izashar bolamyz. Naryqty saǵattyq qyzmetkerlerdi jaldaýdyń jańa tásiline úıretkimiz keledi. Bizde kóptegen seriktes bar. Qosymshada jumys izdegen adam úshin tańdaý kóp. Kóbine adamdar erekshelikke emes, turaqtylyqqa nazar aýdaryp, senimdi jumys berýshige barǵandy qalaıdy, – dedi servıstiń negizin qalaýshy Maǵzum Tólesh.
«Financial Times» zertteýine sáıkes 2050 jylǵa qaraı eńbekke qabiletti halyqtyń 83 paıyzy gıg-ekonomıka salasynda jumys isteıtin bolady. Iаǵnı shtatta emes, belgilengen merzimde qoıylǵan mindetterdi sheshý qajet naqty jobalarda jumys isteıdi. Osy boljamdy eskere otyryp, «EasyTap» qazir modeldi bólshek saýda men qonaqúı jáne tamaqtaný sektorynda ilgeriletýge umtylyp jatyr. Qyrǵyzstan naryǵyna shyǵý otandyq startaptyń bıznesti jahandyq masshtabtaý jónindegi strategııany iske asyrýdaǵy alǵashqy qadamy boldy.
Olar naryqty zerttep, kóptegen máseleniń betin ashqan. Dúkender men kafe, meıramhanalar kúndelikti jumysshy izdep, suraý salady. Ol adam qaıdan kelse de, olarǵa báribir. Bastysy kúndelikti jumysyn tıisti atqarsa boldy. Al bul platformada «Digital ID» qosylǵan. Ol – jeke qujatty anyqtaýǵa arnalǵan júıe. Jumys izdegen adam jeke maǵlumattaryn paıdalanýǵa ruqsat berip, jaýapkershilik jóninde kelisimshartqa qol qoıady.
Qosymshanyń bereri mol. Aptasyna 3 ret jumysqa shyǵyp, 7-8 saǵat jumys istese, orta eseppen aıyna 90 myń teńgeden astam qarjy tabýǵa bolady. Arasynda tolyqqandy jumys isteıtinder de bar. Olar aptasyna 200 myń teńgege deıin tabady. Aqsha men ýaqyttan qysylyp júrgen jandarǵa bul – taptyrmas múmkindik.
– Biz barlyǵyn sapaly jasap, tártippen júrgendi qup kóremiz. Bizdiń ustanymymyz – talap. Ádette talapty jumys berýshi qoıady. Soǵan saı biz adamdy tańdaýǵa kómektesemiz. Bizde túrli bazamen kelisim jasalǵan. Sonyń nátıjesinde adamnyń qandaı qaryzy bolǵanyn, nesıe qaryzy bar-joǵyn anyqtaı alamyz. Oǵan qosa kompanııalar jańa kelgen qyzmetkerdiń qabiletin eki saǵat boıy tekserip kóre alady. Sosyn únemi eki jaqtan keri baılanys alyp otyramyz. Startap bolǵan soń ózgerister men tolyqtyrýlardy jıi jasaımyz, – deıdi Maǵzum.
