Eske salaıyq, atalǵan qoıylym teatr repertýaryna «Astana opera» balet trýppasynyń kórkemdik jetekshisi, Reseı halyq ártisi Altynaı Asylmuratovanyń bastamasymen engen. Qoıýshy horeograf Dıýla Harangozonyń pikirinshe, bul týyndy onyń budan buryn Eýropada sahnalanǵan spektaklderiniń ishindegi úzdigi sanalǵan.
Áp degennen qoıylym kórermenderdi keremet hanshaıym men jeti ergejeıliniń sıqyrly álemine jeteleı jóneldi.
«Astana opera» balet trýppasynyń ártisi Aıdan Qaljan jańa jyldy osy balettegi Hanzadanyń jetekshi partııasymen bastaǵany ózi úshin qýanysh ekenin jetkizdi.
– Mundaǵy Hanzada partııasy – basqa shyǵarmadaǵy hanzadalarǵa qaraǵanda erekshe. Onyń bolmysy qarapaıym, aqkóńil. Bir jaǵynan, partııa – horeografııalyq jáne tehnıkalyq sheshimderimen kúrdeli ári qyzyqty. Jalpy, árbir rólim maǵan shabyt beredi, janyma jylýlyq syılaıdy. Negizi, tabıǵatym jaǵymsyz keıipkerlerdi oınaýǵa jaqyn. Biraq Hanzadanyń partııasy – meni basqa qyrymnan tanytty. Qoıýshy horeograf Dıýla Harangozo klassıkalyq bı qaǵıdasynan alys ketpeı, ony sol kúıinde saqtap, bul baletti jańasha kózqaraspen alyp shyqqan. Jańa partııamen sahnaǵa shyǵar aldynda azdap qobaljyǵanymen kórermenderdiń yqylasyn kórip, jigerlendim. Teatrdyń jas ártisi retinde maǵan osyndaı jetekshi róldi oınaýǵa múmkindik bergenge qýanyp, ózime júktelgen mindetti abyroımen atqardym dep oılaımyn, – dedi ol.
Taǵy bir talantty balet ártisi Jaqsylyq Saýqymbekov ózine Ańshynyń beınesin jasaýǵa qoldaý kórsetken ustazdarynyń eńbegin erekshe atap ótti.
– Qoıylymda Ańshynyń partııasyn alǵash ret oryndadym. Akterlik jaǵynan bolsyn, tehnıkalyq turǵydan bolsyn, bul ról óte qyzyqty. Ol – spektakldegi negizgi keıipkerdiń biri bolǵandyqtan, tehnıkany oılaı otyryp, akterlik oıyndy umytýǵa bolmaıdy. Sondyqtan buǵan men tyńǵylyqty daıyndaldym. Gaýhar Ýsına men Rústem Seıitbekov sekildi ustazdarmen jumys istep, olar maǵan osy partııany sátti alyp shyǵýǵa kóp kómektesti. Ásirese basty rólderdiń birin somdaýǵa múmkindik bergen Altynaı Asylmuratovaǵa aıryqsha alǵysymdy aıtamyn. Ol kisiniń bizdiń talantymyzdy ushtaýǵa qosqan úlesi mol, – dedi daryndy jas.
Kórermender spektakldegi basqa da keıipkerlerdi tabıǵatymen kelistirip oınaǵan solısterderiń ónerine tánti boldy.
