Eriktiler Astananyń barlyq 5 aýdanyn qamtýdy josparlap otyr. Jyl basynan beri qala boıynsha 30-ǵa jýyq jeke sektor aýlasy qardan tazartylypty. Oǵan qosa qoǵam janashyrlary halyqtyń áleýmettik osal toptarynan shyqqan otbasylarǵa azyq-túlik sebetterin taratýdy dástúrge aınaldyrǵan. Egde jastaǵy azamattarǵa otyn jarýǵa da kómektesip júr.
«Jigitter óte jaqsy. Úıilip jáne qatyp qalǵan qardy tazalaý bizge óte qıyn. Osy jasymda ony jasaı almas edim. Aýlaǵa shyǵýym muńǵa aınalyp edi. Jastar kelip, jolymdy qardan tazartyp berdi. Osyndaı tárbıeli jastarymyz ósip kele jatqanyna qýanamyn. Aýlamnyń tazalyǵy ǵana emes, eriktilerdiń pozıtıvtiligi men energııasy da unaıdy», dedi Almaty aýdanynyń turǵyny Lıdııa Logvınova.
Sondaı-aq belsendiler qytymyr qysta, kún-tún demeı qalyń qardy tazalap, qaladaǵy jol qozǵalysynyń qolaılylyǵyna sep bolyp júrgen arnaıy kommýnaldyq qyzmet mamandaryna ystyq shaı da úlestirdi.
«Igiligi mol dástúr qala turǵyndaryn árdaıym qýanyshqa bóleıdi. Aıazdy kúni ystyq shaı adamnyń boıyna jylý berip qana qoımaı, júreginen jylýy tógilip turǵan meıirimdi jandardyń bar ekenin bildiredi. Negizi aksııa jyl boıy jalǵasady. Is-sharaǵa «Astana jastary» jastar resýrstyq ortalyǵynyń janynda volonterler qozǵalysyn damytý bólimi jaýapty. Bólimniń negizgi mindeti – jastardy qalanyń áleýmettik ómirine tartý. Sondyqtan volonterler turaqty negizde volonterlik qyzmettiń ártúrli baǵyttaryna qatysady. «Astana jastary» JRO bazasynda tórtinshi jyl Volonterler jyly sheńberinde jáne 2021-2023 jyldary volonterlikti damytýdyń Jol kartasyn oryndaý sheńberinde volonterlik uıymdar men qozǵalystardy shoǵyrlandyrýdy uıymdastyrý, aqparattyq jáne resýrstyq kómek kórsetý, qalada is-sharalardy esepke alýdy júrgizý, kúsh-jigerdi biriktirý, derbes qozǵalystar sanyn ulǵaıtý úshin Qalalyq volonterler shtaby jumys isteıdi. Turaqty negizde 30 volonterlik uıymmen jáne 20 bastamashyl toppen, 4 ÚEU-men memlekettik jastar saıasatyn iske asyrý salasynda, kásiporyndar men qala mesenattarymen yntymaqtastyq jáne birlesken qyzmet júrgiziledi. Shtabta 6 myńnan astam belsendi volonter bar», dedi Astana qalasy ákimdiginiń «Astana jastary» JRO» KMM-niń volonterler qozǵalysyn damytý bóliminiń mamany Aızat Álı.
Aıta keteıik, ótken jyly volonterlikti damytýdyń 2021-2023 jyldarǵa arnalǵan Jol kartasyn iske asyrý jumystary aıaqtaldy. Nátıjesinde, volonterlik uıymdardyń sany 3 esege artty. Mádenıet jáne aqparat mınıstrliginiń málimetinshe, volonterlik ınfraqurylymdy damytý baǵytynda respýblıkalyq jáne 20 óńirlik front-ofıs jumys isteıdi. Sondaı-aq Qazvolunteer.kz onlaın platformasy iske qosylyp, onda búginde 60 myńnan asa belsendi volonter tirkelgen. 150-den astam volonterlik joba jáne 700-den asa volonterlik bastama iske asty. Sondaı-aq azamattardy volonterlik qyzmetke qatysýǵa yntalandyrýǵa baǵyttalǵan «Volonterlik qyzmet týraly» zańǵa túzetýler engizildi.
Endi elimizde volonterlikti damytý men qoldaýdyń 2024-2026 jyldarǵa arnalǵan Jol kartasy qabyldandy. Qujatty ázirleýge respýblıkanyń 20 óńirinen 500-den asa adam qatysty. Bastama sheńberinde 200-den astam usynys túsken.
