Jas sýretshi Arýjan Unarbekova áleýmettik jelide anıme stılindegi erekshe týyndylarymen tanymal. Ásirese ıllıýstratordyń el Prezıdenti Qasym-Jomart Toqaev beınelengen stıkerleri eldiń esinde bolar. Iá, bala-qııaldyń aspany sheksiz. Arýjannyń qylqalamǵa degen qyzyǵýshylyǵyn japon komıksteri oıatqan. Qazirgi ýaqyttyń, ásirese shyǵarmashyl jandarǵa ıgiligi kóp. Ashyq alańda kez kelgen sheber óz týyndysyn usyna alady. Jas talanttyń atyn shyǵaryp, ataǵyn alys-jaqyn shetelge jetkizgen de osy áleýmettik jeli eken.
– Birde TikTok-qa qyzyqty vıdeo salaıyn dep, sýretterimniń birin jarııaladym. Aýdıtorııa unatty. Artynan taǵy bir vıdeo shyǵardym, ol da kóptiń kóńilinen shyqty. Tapsyrystar túsip, tabys taba bastadym. Birde Memleket basshysynyń sýretin saldym. Halyq jaqsy qabyldady, 2 mıllıonǵa jýyq qaralym jınady. Tańǵalyp, baǵa bergender de kóp boldy», – deıdi Arýjan bir suhbatynda.
Jas sýretshiniń ereksheligi – tarıhı tulǵalardyń obrazy zamanaýı stılde salynǵan. Qoǵamǵa da jattandy beıneler áser ete qoımaıtyny shyn. Sondyqtan Arýjan Qasym-Jomart Toqaevty Memleket basshysy retinde emes, qarapaıym adam retinde, jastardyń talǵamyna saı usynady.
Prezıdenttiń sýretimen stıkerler jasap shyǵarý ıdeıasy da halyqqa erekshe unady. Stıkerdegi Memleket basshysynyń sıtatalaryn Arýjan ınternetten ózi izdep taýyp, tańdap paıdalanǵan. Daıyn jumysty halyqqa kórsetýge Prezıdenttiń teleradıokesheni kómektesken.
Keıingi ýaqytta Alash qaıratkerleriniń zamanaýı beınesi áleýmettik jelilerde jıi taralyp júr. Taý-tulǵalar obrazy Arýjannyń shyǵarmashylyǵynda da erekshe mánge ıe. Sýretshi Abylaı hannyń, Álıhan Bókeıhannyń, Ilııas Jansúgirovtiń, Dinmuhamed Qonaevtyń obrazdaryn anıme stılinde saldy.
«Maqsatym – batyrlarymyzdy eldiń esine salý edi. Jas býyn olardy umytpasa eken deımin. Barlyq úıdiń qabyrǵasynda Álıhan Bókeıhan beınelense ǵoı degen oı boldy. Tarıhı tulǵalardyń obrazyn qatty ózgertken joqpyn. Jumysym unady, qyzyǵýshylyq tanytqandar boldy», deıdi sýretshi.
Aıta keteıik, Arýjan Unarbekova «Tasqyn» anımasııalyq stýdııasynda eńbek etti. Jas daryn kúıshi Qurmanǵazy týraly mýltfılmdi jasaýǵa atsalysqan. Keıipkerlerdiń sýretin salyp, kásibı sýretshilerden sabaq alyp, tájirıbe jınaǵan. Onyń pikirinshe, elimizde qazaq anımasııasy qarqyndy damyp keledi.
Sýret ónerinde túrli eksperımentterge baryp, óz stılin qalyptastyrǵan jas talanttyń týyndylary elimizde ǵana emes, shetelderde de suranysqa ıe. Bala kezinen úıir bolǵan súıikti isinen búginde tabys ta taýyp júr. Ásirese AQSh-tan tapsyrys berýshiler kóp eken. Arab jazýshysy Arýjanǵa kitabyna komıks salýdy usynǵan. Shyǵarmashylyqta óz jolyn tapqan jas sýretshiniń qylqalamy ulttyq boıaýdan arylmaq emes. Aldaǵy ýaqytta da qazaqtyń dińgegine aınalǵan zııalylardy zamanaýı sıpatta beıneleýdi josparlap otyr. Avtordyń sheberligi ýaqytpen birge shyńdala túsip, ónerdegi taqyryby da, tynysy da keńeıetini sózsiz.
