Qoıǵa shapqan qasqyr ma?

Samar aýdany, Kókjota aýylynda bolǵan jaǵdaıdy estigen aýdan ákimdiginiń ókilderi, polısııa qyzmetkerleri dereý oqıǵa ornyna jetken. Aýdan basshylyǵy malǵa shapqan jyrtqyshtyń sileýsin bolýy múmkin dep bol­jap otyr. Sebebi qasqyr qora­nyń kishkentaı qýysynan kirip ketýi neǵaıbil. Onyń ústine qoıdy jalmaǵanymen, jarmaǵan. Quıryq tusyn uńǵyp ketip otyr­ǵan.

– Belgisiz jyrtqysh qoraǵa esiktiń túbin qazyp kirgen. Si­leýsin be dep oılaımyz. Qasqyr bolsa, qoıdy jaryp keter edi. Bul jyrtqysh qan ishken se­kildi. Jaraly qoılar baýyz­daldy. Bárin jınap alyp, aýyl irgesindegi mal óleksesin kó­mýge arnalǵan orynǵa aparamyz. Sebebi jyrtqyshtyń sile­keıinde túrli aýrýlar bolýy múmkin. Okrýg ákimi keltirilgen shy­ǵyndy esepteıdi, – dedi Sa­mar aýdany ákiminiń orynbasary Qaıdar Surashev.

Al mal ıesi Edilhan Sarbasov qoıyn qyrǵan qasqyr ma dep joramaldap otyr. Ázirshe joramal ǵana. Anyǵyn ańshylar da dóp basyp aıta almaı otyr. Kókjota aýyly Qulynjon qoryǵyna irgeles jatqandyqtan, ań túri kóp munda. Onyń ústine qoryq aýmaǵynda ań aýlaýǵa zańmen tyıym salynǵan.

– Tańerteń qoraǵa kirip barsam, ishi qan-josa. Qoı qyrylyp jatyr. Shoshyp kettim. Kásibı ańshylar aýylǵa kirgen jáne shyqqan izine deıin taýyp aldy. Qasqyr ma dep boljap otyr. Shamasy úsheý sekildi. Bi­reýiniń izi – úlken, ekeýiniki – kishi­leý. Áýelde sileýsin dep oıla­dyq. Ańshylardyń aıtýyn­sha, sileýsin bulaı bir sátte qy­ryp kete almaıdy eken. Munda jantúrshigerlik jaǵdaı aýylda birinshi ret bolyp otyr. Ba­lalar keshkisin jaı keledi. Jyrtqyshtar aýylda jaıbaraqat júr. Alańdaıtyn boldyq. Adamǵa shapsa qaıtemiz? – deıdi mal ıesi Edilhan Sarbasov.

Ańshylar iz kesip kórgenimen, jyrtqysh toǵaıdyń ishine kirip joq bolǵan. Ań sharýashylyǵy mamandary qoryq aýmaǵynan tys jerde bolsa, 15 aqpanǵa deıin atýǵa ruqsat berip otyrǵan kórinedi. Veterınar ınspek­sııa­sy da tıisti mekemelerge aldyn alý kerektigin eskertip otyr. Osy oraıda ıt-qustyń malǵa shabýyl jasaý oqıǵalarynyń aldyn alý úshin jergilikti ańshylarǵa jáne orman sharýashylyǵynyń ınspektoryna jyrtqyshtardy baqylaýǵa alýǵa qatysty arnaıy tapsyrma berildi. Aıta ke­teıik, túz taǵylarynan qaýip Samar óńirinde ǵana emes, basqa aýdandarǵa da tónip tur.

Shyǵys Qazaqstan oblysy,

Samar aýdany