Tóraǵa orynbasary elimizdiń áıelder quqyqtaryn qorǵaý jáne genderlik teńdik máselelerin ilgeriletý salasynda aıtarlyqtaı nátıjege qol jetkizgenin atap ótti. Genderlik saıasattyń ulttyq úlgisi, quqyqtyq baza jáne adam quqyqtaryn qorǵaý tetigi jasaldy.
«Memleket basshysy júrgizip otyrǵan áleýmettik jańǵyrtýdaǵy negizgi baǵyttardyń biri – elimizde genderlik tepe-teńdikke qol jetkizý, áıelderdiń saıası, ekonomıkalyq jáne áleýmettik ómirge belsendi qatysýyna teń múmkindikter jasaý. Saılaýdaǵy partııa tizimderine, sondaı-aq depýtattyq mandattardy bólý kezinde áıelderge, jastarǵa jáne múgedektigi bar adamdarǵa zańnamalyq deńgeıde 30% kvota engizildi. Búgingi tańda elimizdiń joǵary ókildi organy – Qazaqstan Parlamentinde 31 áıel bar, ol jalpy depýtattar sanynyń 21%-yn quraıdy. Onyń ishinde Senattyń 24%-y, Májilistiń 19%-y áıelder», dedi Olga Perepechına.
Kezdesýge qatysýshylar adam áleýetin damytý men teńdeı qatysý, tıimdi ınstıtýttar, adam quqyqtary men genderlik teńdik, sondaı-aq ınklıýzıvti ekonomıkalyq ósý men ekologııalyq turaqtylyq salasyndaǵy yntymaqtastyqty odan ári damytý máselelerin talqylady.
Olga Perepechına turaqty damý salasyndaǵy ulttyq maqsattar men mindetterdiń iske asýyna monıtorıng júrgizý jónindegi parlamenttik komıssııanyń otyrystary týraly aıtyp berdi. Onda densaýlyq saqtaý men bilim berýdiń sapasyn kóterý jáne ekologııany qamtamasyz etý máseleleri qaraldy.
Nık Hartmann óz kezeginde Qazaqstanda júrgizilip jatqan qoǵamdyq-saıası ózgeristerdi joǵary baǵalap, barlyq baǵyttaǵy yntymaqtastyq aıasyn keńeıtýge nazar aýdardy.
