Sýretti túsirgen – Erlan OMAR, «EQ»
2022 jyly Beıjiń qalasynda ótken qysqy Olımpıada el jadynda alǵash ret tabıǵı qarsyz ótken doda retinde saqtaldy. Birneshe aptadan beri shaharǵa qardyń túspeýi sport jankúıerlerin alańdatyp qoıǵany ras. Alaıda qytaı eliniń astanasy amalyn tapty. Arnaıy qurylǵylar arqyly oıyn ótetin barlyq nysan alańdaryn jasandy qarǵa toltyrdy. Sóıte turyp qytaılar norveg pen nemisten keıingi orynǵa taban tirep, baıraqty básekeni abyroımen qorytyndylady. Hosh, aıtpaǵymyz bul emes. Qalaýyn taýyp, qoldan qar jasaǵan kórshilerimizge qaraǵanda, bizdiń tabıǵat qysqy sportqa óte qolaıly. Tek ınfraqurylym máselesin tezdetip sheshkenimiz jón.
1998 jyly Nagano qalasynda ótken qysqy Olımpıada oıyndarynyń qola júldegeri, jerlesimiz Lıýdmıla Prokashevanyń aıtýynsha, medal alý úshin myqty sport bazalary men jabyq muz aıdyndary bolýy kerek.
«Qazir konkı sportymen aınalysýǵa yńǵaıly eki jabyq stadıon bar. Biri Astana qalasyndaǵy «Alaý» muzaıdyny bolsa, biri – Almatydaǵy «Medeý» sport kompleksi. Sonyń saldarynan basqa óńirdegi sportshylar Astana qalasyna kelip jattyǵýǵa májbúr. Sondyqtan sporttyq ınfraqurylym máselesin tolyq sheshpeı, chempıondarymyz kóbeımeıdi», deıdi ol.
Onysy shyndyq. Qashpaǵan qashardyń ýyzynan dámetkendeı, jattyǵatyn orny joq sportshylardan jeńis dámetý – áýreshilik. Bul týraly Astana qalasynyń Deneshynyqtyrý jáne sport basqarmasynyń buqaralyq sport bóliminiń basshysy Azamat Aǵzamovpen sóılestik. Onyń aıtýynsha, elorda turǵyndary men sportshylarynyń jaǵdaıy aıtarlyqtaı jaman emes.
«Qazir halyqtyń salamatty ómir saltyna den qoıyp jatqany jasyryn emes. Sol sebepti deneshynyqtyrýmen turaqty shuǵyldanýshylar sany kóbeıip keledi. Naqty Astana qalasy boıynsha málimet bereıik. Qazir sporttyq ınfraqurylymdar jańartylyp, jóndeý jumystary júrgizilip jatyr. Sonymen qatar qazir buqaralyq sportty damytý maqsatynda qalamyzdyń 4 aýdanynda deneshynyqtyrý jáne saýyqtyrý kesheniniń qurylysy josparda tur. Jyl sońyna deıin «Temirjol» massıvinde de jańa kompleks iske qosylmaqshy. Bul – atqarylyp jatqan jumystardyń bir bóligi ǵana», deıdi A.Aǵzamov.
Durys, aýyzdy qur shóppen súrtýge bolmaıdy. Jerlesterimiz namysqa tyrysyp baǵady. Jaqynda Ońtústik Koreıanyń Kanvon qalasyndaǵy jasóspirimderdiń IV qysqy Olımpıada oıyndarynda Polına Omelchýk short-trekten qola júldeger, al shańǵymen tuǵyrdan sekirý saıysynda 38 qarsylaspen synǵa túsken Ilıa Mızernyh chempıon atanǵany týraly aqjoltaı jańalyq bárimizdi erekshe qýantty. Bul qarqynmen qysqy sporttyń otanyna aınalǵan Norvegııa, Nıderland sportshylarymen de ıyq tiresetin kún alys emes dep senemiz.
Norvegııa demekshi, bul memlekette sporttyń damýyna erekshe áser etetin myna bir tájirıbe bar. Balalar arasyndaǵy jarysta eshqashan altyn, kúmis, qola degen sekildi medal berilmeıdi. Dodaǵa túsken sportshylardyń bári birdeı marapattalady. Munyń sebebin sport tizginin ustaǵandar bylaı túsindiredi. Eger bala jas kezinde taýy shaǵylsa, keleshekte sol sportty tastap ketý yqtımaldyǵy kóbeıedi Al jeńilse de, qurdasymen birdeı medal alǵan órenniń sportqa degen yntasy ashylady. Sonymen qatar Norvegııada buqaralyq sport ta jolǵa qoıylǵan. Endi myna derekke nazar aýdaraıyq. Norvegııanyń 30–40 myńdyq qalashyqtarynyń basym bóliginde kem degende 200 shaqyrymdyq velosıped joly, 3 shańǵy joly, halyqaralyq talaptarǵa saı stadıon jáne ózge de sport nysandary bolady. Shańǵy joldarynyń barlyǵy jaryqpen qamtamasyz etilgen. Iаǵnı táýliktiń kez kelgen ýaqytynda jattyǵýǵa múmkindik bar. Al sport zaly men muzaıdyny kez kelgen eldi mekende bar. Halyq bos ýaqytynda shańǵy teýip, konkımen jarysqa túsedi. Sol arqyly ishki mádenıeti qalyptasqan. Tórtjyldyqtyń basty básekesi – Olımpııa oıyndarynda da skandınav sportshylary báıgeniń aldyn bermeı kele jatqany sodan dep topshylaımyz.
Balalardy sportqa tartýdyń taǵy bir joly – fenomen kýlti. Aıtalyq, bir ǵana Denıs Tenniń Dımash Qudaıbergenmen jasaǵan kollaborasııasy qanshama jas balanyń mánerlep syrǵanaýǵa yntasyn oıatty. Bala qandaı da bir ónerdiń, ıakı sporttyń mańyzynan buryn, ony nasıhattap otyrǵan tulǵaǵa tánti bolady. Sol arqyly eliktegen adamǵa ere júrip, óz dańǵyl jolyn qalyptastyrady. Bul úderiske Úkimetten bastap, memleketimizdiń árbir azamaty atsalysýy kerek.
