Kanvon: 1 altyn, 2 qola

Qazaqstan namysyn sport­tyń 5 túrinen (9 baǵdarlama) 41 jasóspirim qorǵady. Nátı­jesinde, sportshylarymyz 1 al­tyn, 2 qola medalmen beıres­mı jalpykomandalyq esepte 20-orynǵa taban tiredi. 14 kún boıy jalaýy jelbiregen baı­raqty básekede ulttyq qurama sportshylarynyń jekelegen baǵ­darlamadaǵy nátıjesine kóz júgirtip ótsek.

Týrızm jáne sport mı­nıstr­ligi Sportty damytý dırek­sııa­synyń baspasóz qyzmeti ha­­bar­laǵandaı, aldymen Olım­pıa­danyń alǵashqy kúni shań­ǵy­men tuǵyrdan sekirý jary­synda Qazaqstan Ánurany shyr­qal­dy. Ilıa Mızernyh 214 upaı ­jınap, jasóspirimderdiń qys­qy Olım­pıadasynda tuńǵysh Qazaqstan chempıo­ny atandy. ­Bul kúni Alıona Svırıdenko – 27, ­So­fıa Shıshkına – 29, Ilıa Shıl­nıkov 30-oryn aldy. Ara­las komandalyq saıysta Qazaq­stan (Ilıa Mızernyh, Ilıa Shıl­­nıkov, Sofıa Shıshkına men Alıona Svırıdenko) 491,3 upaı jı­nap, 13-satyǵa taban tiredi.

Short-trekten Qazaqstan oıyn­darǵa tolyq quramda (2 ul, 2 qyz) qatysqan toǵyz eldiń biri boldy. Munda Polına Omel­chýk 1 000 metrge jarys­ta qola júldege qol jetkizdi. Son­daı-aq ol 1 500 metrge jarys­ta fınalǵa shyqqanymen me­dal ala almady (6-oryn). Anas­tasııa Astrahansevanyń úzdik kór­setkishi – V fınaly (6-oryn). Uldar arasynda Erasyl Shyń­ǵyshan men Meıirjan Tólegen­niń jekeleı syndaǵy úzdik ná­tıjesi shırek fınal boldy. Esta­fetada Qazaqstan jartylaı fınalda Erasyldyń qulap qalýyna baılanysty jarysty aıaqtaı almady. Hokkeıden (3×3) ulttyq qurama jarady. Qola júlde úshin bolǵan kezdesýde Aýstrııadan 6:5 esebimen basym túsip, júldegerler qatary­nan kórindi. Jasóspirimder olımpıadasyna (3×3) hokkeı alǵash ret qosylǵanyn aıta keteıik. Qazaqstan toptyq kezeńde Pol­sha, Ispanııa, Ulybrıtanııa, Qy­taıdyń Taıpeıin iri eseppen jeń­gen-di. Alaıda Danııa, Aýstrııa, Latvııaǵa tartysty match­ta jol berdi. Soǵan qaramastan pleı-ofqa shyǵyp, jartylaı fınalda Latvııaǵa taǵy ese jiberdi.

– Jasóspirimder Olımpıa­dasynda alǵash ret baq synap, qarsylastarymyzben sońyna deıin aıqastyq, – dep bastady áńgimesin hokkeıshi Jahanger Tileýhan. – Alǵashqy Polshamen ótken kezdesýde iri jeńiske jet­kenimizben, Aýstrııamen teń­deı oıynda 8:9 esebimen jeńildik. Birinshi jeńilis komandamyz­ǵa emosııalyq turǵyda áser etti. De­genmen qola júlde úshin oıyn­da qaıta jolyǵyp, ese­­miz­di qaıtara aldyq. Qandaı qo­ry­tyndy shyǵarýǵa bolady? Sa­lystyrmaly túrde biz Lat­vııa­dan keıin eń kóp 104 shaıba soq­qan komanda atandyq. Áıt­se de kóptegen múmkindikti qol­da­na almadyq. Kemshiligimiz – qor­ǵanysymyzdyń turaq­syz­dyǵy. Sebebi 9 oıynda qaq­pamyzǵa 83 shaıba ótkizip aldyq. Tipti chempıon atanǵan Latvııany birinshi kezeńde utqanymyzben, keıin birneshe shaıba jiberdik. Jalpy, Olımpıadada Qazaq­stan ult­tyq quramasynyń tizimine enip, el namysyn qorǵaǵanym­dy maqtan tutamyn.

Taý shańǵysynda el namysyn Aleksandra Skorohodova men Vladıslav Hohlov qorǵa­dy. Aleksandranyń úzdik kórset­ki­shi – 5-oryn (gıgant slalom). Al Vla­dıslavtyń nátıjesi – 19-oryn (slalom). Konkımen júgirýde ápkeli-sińlili Krıstı­na jáne Alına Shýmekovalar, Rýslan Janádilov pen Mıhaıl Matrıýhın synǵa tústi. Olar­dyń nátıjesi mynadaı: Krıstı­na Shýmekova – 7-oryn, (500 jáne ­1 500 m), Alına Shýmekova – 10-oryn (500 m), Rýslan Janádilov – 8-oryn, (1 500 m) jáne Mıhaıl Matrıýhın 17-orynnan (1 500 m) kórindi.

Buǵan deıingi oıyndarda eń kóp júlde alǵan bıatlonnan bul joly júldesiz qaldyq. Aralas juptyq synda Ilııas pen Alema Qarabaevalar 10-orynda bolsa, aralas komandalyq estafetada Qazaqstan 11-orynnan kórindi. Jekeleı syndaǵy jaqsy nátıje – Kırıll Zotovtyń enshisinde (23-oryn, 12,5 km). Frıstaıldyń mogýl túrinde Iýlııa Feklıstova 9, al Denıs Rastrýba uldar arasynda 10-satydan kórindi. Komandalyq jarysty ekeýi de 12-orynmen aıaqtady.

Kıorlıngten ulttyq qurama músheleri Ibragım men Mereı Tastemirler toptyq kezeńnen shy­ǵa almady. Alǵashqy kezeń­de olar Italııadan basym tús­ken-di. Alaıda Aýstrııa, Ger­manııa, Shveısarııa men Da­nııa quramasyna ese jiber­di. Shańǵymen jarysta Qazaq­stan quramasy (Berik Boran­baev, Áýbákir Totanov, Mı­lana Mamedova, Vıoletta Mıtro­polskaıa) estafetada 16-bolyp máre syzyǵyn kesti. Bul – olar­dyń Alpensııa keshenindegi eń jaqsy nátıjesi. Jekeleı syn­da­ǵy jaqsy kórsetkish – Berik Boranbaev (22-oryn, erkin ádis) pen Vıoletta Mıtropolskaıada (25-oryn, klassıkalyq ádis).

Kanvon tórinde Qazaqstan sportshylary alǵash ret frıstaıl-mogýl, hokkeı (3×3) men kıor­lıngten júldege talasty. Bar­lyq 4 qysqy Olımpıadany qosa eseptegende, Qazaqstan je­ńip alǵan medal sany 8-ge jet­ti (1 altyn, 1 kúmis, 6 qola). Ońtústik Koreıada Qazaqstan qor­jynyna alǵashqy altyn me­dal tústi. Týnıs pen BAÁ eliniń sport­shylary alǵash ret qysqy jas­óspirimder Olımpıadasynda baq synady. Olar 7 sport túri­nen (15 baǵdarlamada) 81 júlde jıyntyǵyn sarapqa saldy. Kósh basynda 11 altyny bar Italııa tursa, odan keıin Germanııa jaı­ǵasty. Eń kóp júlde alǵan memleket – AQSh (21). Kannynda Bra­zılııa, Taıland, Túrkııa men Týnıs sportshysy alǵash ret óz eline júlde syılady. Keshen­di jarys 12 nysanda ótti. Onyń jeteýi 2018 jylǵy Phench­han Olımpıadasy kezinde salynǵan.

Sonymen, 2 aqpanda Kan­nyn qalasyndaǵy «Youth Olympic Park» kesheninde ótken jabylý saltanatynda elimizdiń Kók baı­raǵyn Berik Boranbaev pen Me­reı Tastemir ustap shyqty. 2028 jylǵy Qysqy oıyndardy qabyldaıtyn el 2025 jyly belgili bolady. Al 2026 jyly Senegalda (Dakar-2026) jazǵy sport túrlerinen jasóspirimder Olımpıadasy ótedi.