Bıylǵy jarystyń jalaýy Katardyń astanasy Dohada jelbiredi. 2 aqpannan beri barsha jankúıer nazary sol jaqqa aýdy. Ara-tura Qazaqstannyń sportshylary táýir óner kórsetip, fınalǵa shyqqany jaıynda da estip jatyrmyz. Biraq birde-bir jerlesimiz jeńis tuǵyryna kóterile almady. Al ózge eldiń ókilderi ár kún saıyn túrli-tústi medaldardy moınynda jarqyratyp jatty. Kúni búginge deıin biz solarǵa qyzyǵa qarap keldik.
Keshe Parsy shyǵanaǵynan qýanyshty habar jetti. Ártistik júzýden quramynda Nargıza Bolatova men Edýard Kım syndy dúldúlderi bar Qazaqstan komandasy aralas juptar saıysynda qarsylas shaq keltirmeı, bas júldeni oljalady. Bul – Qazaqstannyń sý sporty sheberleriniń álem chempıonatyndaǵy tuńǵysh ári tarıhı altyny! Qutty bolsyn, Qazaq eli! Aldaǵy ýaqytta osy jeńisti jol jalǵasady dep úmittenemiz. Bul básekede Qytaı ekinshi oryn alsa, Meksıka úshinshi satyǵa jaıǵasty.
