«QazTransGaz Aımaq» AQ gaz jelilerine qosylarda tehnıkalyq sharttardy alý úshin ótinimdi endi eGov.kz portalynda elektrondyq sıfrlyq qoltańba kómegimen onlaın qaldyrýǵa bolady. Daıyn bolǵan tehnıkalyq sharttardy SMS habarlama túrinde joldanǵan siltemege ótip, júktep alýǵa bolady. Osy oraıda tehnıkalyq sharttardyń tegin beriletinin atap ótken jón.
Qulaqqaǵys retinde aıtar bolsaq, 2023 jyldyń 29 tamyzynda «Tabıǵı monopolııalar týraly» zańyna tehnıkalyq sharttardyń merzimine qatysty ózgerister engizildi. Osy túzetýde tehnıkalyq sharttar berilgen sátten bastap jaramdylyq merzimi 3 jyldan aspaıtyny naqty jazylǵan. Tek bul ózgeristerdiń qurylysy júrip jatqan tehnıkalyq sharttarǵa esh qatysy joq.
Osy túzetýlerge deıin tehnıkalyq sharttardyń arnaıy belgilengen merzimi bolmaǵan. Osylaısha, tehnıkalyq sharttardyń barlyq ıeleri qujattyń jaramdylyq merzimi berilgen ýaqytynan úsh jyl ótkende, biraq ol merzim 2024 jyldyń 1 shildesinen erte aıaqtalmaıtynyn eskerýi kerek. Bul jobalardy dálirek josparlaýdy jáne tıimdi baqylaýdy qamtamasyz etedi. Sonymen qatar gazdyń bos qýat tapshylyǵyn boldyrmaıdy. Zańnamadaǵy túzetýlerdi Parlament Májilisiniń depýtattary usynyp, qabyldady.
Buǵan qosa ınfraqurylymdyq jelilerdiń qoljetimdi bolýy úshin ákimshilik kedergilerdi azaıtý maqsatynda 2023 jyly qoljetimdilik sharttary da jeńildetildi. Tehnıkalyq sharttardy alýǵa ótinish berý úshin qajetti qujattar sany eki ese qysqardy. Sondaı-aq turǵyn úı nemese nysannyń gaz júıesine qosylýǵa daıyndyǵyn tekserý úshin qajetti qujattar sany 14-ten 5-ke deıin qysqarǵan.
