Foto: gov.kz
«Qazir qurylys salasynda saraptama jasaýdy memlekettiń ıeligine qaıtarý máselesi qyzý talqylanyp jatyr. Azamattardyń qaýipsizdigin qamtamasyz etý – eń basty mindet. Qurylys sapasyna jasalatyn baqylaýdy mindetti túrde kúsheıtý kerek. Bul – anyq dúnıe. Alaıda, memleket osy naryqty túgel ıemdenip almaýy qajet. Shynaıy báseke bolýǵa tıis. Úkimet barlyq taraptyń múddesin eskerýi kerek.
Bul salada úleskerlik qurylysqa, ǵımarattardyń zańsyz ári orynsyz salynýyna, múlik ıeleriniń birlestigin reformalaýǵa qatysty qordalanǵan máseleler bar. Azamattar únemi shaǵymdanyp jatady. Alaıda, quzyrly organdar áli kúnge deıin tıisti shara qoldanbaı otyr. Úkimet bul másele boıynsha jyl sońyna deıin naqty sheshim qabyldaýy kerek», degen Prezıdent sybaılas jemqorlyq barlyq salaǵa da dendep enip, uıalap alǵanyn aıtty.
Memleket basshysynyń aıtýynsha, sybaılas jemqorlyq - el ekonomıkasyn damytýǵa tosqaýyl bolatyn negizi faktor.
«Taǵy bir ózekti másele – sybaılas jemqorlyq. Bul – qurylys salasyn ǵana emes, jalpy ekonomıkany damytýǵa tosqaýyl bolatyn faktor. Sybaılas jemqorlyqqa qarsy jappaı kúresý qajet. Men bul týraly únemi aıtyp júrmin. Osy baǵytta biraz jumys jasaldy, nátıje de bar. Biraq, solaı eken dep, bosańsýǵa bolmaıdy. Jumysty jalǵastyrý qajet. Ásirese, sıfrlandyrýdy belsendi túrde qoldaný kerek.
Qazir qurylys salasynda birneshe aqparattyq júıe bar. Osyndaı tásilder arqyly bólingen qarajattyń maqsatqa saı jumsalýyn qamtamasyz etý qajet, ıaǵnı barynsha ashyq jáne qatań baqylaý bolýǵa tıis. Bul – óte mańyzdy másele. Sebebi, qarjynyń urlanýy, eń aldymen, qurylystyń sapasyna áser etedi jáne bıýdjetke qosymsha salmaq salady. Aqshaǵa sıfrlyq teńge arqyly en salý jáne ony qadaǵalaý, basqasha aıtqanda, «aqshany boıaý» bıýdjet qarajatynyń jumsalýyn baqylaıtyn óte mańyzdy tetik bolýy múmkin», dedi Q.Toqaev.
Prezıdent sıfrlyq valıýtany qoldanýǵa qatysty pılottyq jobalar tıimdi bolǵanyn aıtyp, Sybaılas jemqorlyqqa qarsy is-qımyl agenttigine Úkimetpen jáne Ulttyq bankpen birlesip, osyndaı jobalardyń aýqymyn keńeıtýdi, onyń ishinde qurylys salasyna barynsha engizýdi tapsyrdy.
