Qabyldanǵan strategııanyń tıimdiligi

«Qujattaǵy basty basym­dyq­tar­dy eskere otyryp, damýdyń úsh baǵyty belgilendi. Banktiń el ekonomıkasyna qosqan úlesin ulǵaıtý jáne bank aktıvterin basqarýdyń tıimdiligi men turaqty damýy aıqyndaldy. Bul Memleket basshysynyń 2029 jylǵa qaraı ishki jalpy ónim kólemin eki esege arttyrý jónindegi belgilengen mindetke qol jetkizýge eleýli úles qosatynyna senimdimiz», deıdi «Báıterek» UBH» AQ eks-bas­qarma tóraǵasy, QDB dırektorlar keńesiniń basshysy Nurlan Baıbazarov.

Atalǵan turaqty damýǵa qa­tys­ty birinshi baǵytta, bank áleý­mettik-ekonomıkalyq áseri mol, orta jáne joǵary qaıta óńdeý ónimderin shyǵarýǵa zer salyp, óńdeýshi ónerkásip jobalaryn qarjylandyrýdy kózdeıdi. Sonymen qatar ımportty almas­tyrýdy qamtamasyz etetin jáne eksporttyq áleýeti bar joba­larǵa qoldaý kórsete otyryp, eli­mizdiń ınfraqurylymyn da­mytýǵa qarjylaı quraldar usy­natyn bolady. Bul baǵyttaǵy basty mindetterdiń biri – jalpy el ekonomıkasyn damytýdaǵy jeke sektordyń rólin nyǵaıtýǵa kómektesedi.

Osy mindetterdi iske asyrý úshin QDB ınvestısııalyq jobalar men eksporttyq operasııa­lardy orta jáne uzaqmerzimdi nesıeleýdi, aǵymdaǵy qyzmetti nesıeleýdi, sındıkattalǵan qar­jy­landyrýdy, lızıngtik mámi­lelerdi qarjylandyrýdy, kepil­dikter berýdi jáne bankara­lyq qar­jylandyrýdy qosa alǵanda, qural­dardyń keń spektrin paıdalanatyn bolady.

2033 jyldyń sońyna qaraı QDB-nyń maqsaty О́nerkásipti da­mytý qorynyń quraldary ar­qyly 3,1 trln teńgeni qosa al­ǵanda, óńdeý ónerkásibi men ınfra­qurylymǵa 9,3 trln teńge somasynda ınvestısııa bólýge tıis. Bul rette banktiń nesıelik qorjyny qurylymyndaǵy orta jáne joǵary qaıta óńdeý taýarlaryn shyǵarý jobalarynyń úlesi 2033 jylǵa qaraı keminde 30%, al ınfraqurylymdyq joba­lar­dyń úlesi 35%-dy quraýy shart. Osylaısha, naqty qoldaýdyń arqa­syn­da kásiporyndar óz qarjy­lyq kórsetkishterin jaqsarta alady. Máselen, bank maqsaty iske asqan jaǵdaıda qoldaý kórsetilgen kásiporyndardyń túsim kólemi 2024-2033 jyldary 5,17 trln teń­ge­ge deıin ósip, eksporttyq túsim kólemi 2 trln teńgeden asýǵa tıis degen boljam bar.

Ekinshi baǵyt – QDB qorjy­nynyń qarjylyq turaqtylyǵy men joǵary sapasyn saqtaýdy, jobalardy keıinnen qarjylandyrý úshin qorlandyrý bazasyn ulǵaı­tý­dy bildiredi. Osy baǵyt­ty iske asyrý nátıjesinde bank aktıv­te­rinen nesıelik jáne lızıngtik qorjyndardyń úlesi 2033 jylǵa qaraı 77%-dy quraýǵa tıis. Bank qarajat tartý úshin ishki jáne ha­lyq­aralyq kapıtal nary­ǵyn­da bel­sendi jumys isteýdi jal­ǵas­ty­­rady.

Úshinshi baǵyt – osy jylǵa deıin bank qyzmetine ESG-qaǵı­dattary túgel engizilip, osy ar­qyly turaqty damý salasyndaǵy bel­gilengen halyqaralyq kelisim­der men kórsetilgen standarttar talaptaryna sáıkes júrgiziletin bolady. Búginderi áleýmettik jaýapty uıym retinde ESG engizýde óziniń «Jol kartasyn» iske asyrýdy qolǵa aldy.