Jyr báıgesine oblystyń aýdan, qalalarynan, Kókshetaý men Astanadan, Ulytaýdan, Jańarqadan, Baıanaýyldan 14 aqyn qatysty. Tús aýa bastalǵan aıtys túnge deıin sozyldy. Jaýyrtaý jurty jyrǵa ábden shóldegen eken. Aıtys támamdalǵansha tyrp etpedi. Aıtysty belgili aqyn Aıtbaı Jumaǵul tizgindedi.
– Tól ónerimiz aıtysqa degen eldiń saǵynyshy sonshalyq, túngi on bir jarymǵa deıin tapjylmaı kýá boldy. Osyndaı jyr jármeńkesin uıymdastyrǵan qala ákimi Oraz Qaısaulyna, mádenıet jáne tilderdi damytý bóliminiń basshysy Aıjan Qoıshybaıqyzyna halyqtyń da, aqyndardyń da alǵysy sheksiz. Aldaǵy ýaqytta bul aıtys dástúrli túrde ótetin bolady. Budan bólek, aldaǵy jyly Buqar jyraý men Bazar jyraýdyń murasyn nasıhattaýǵa arnalǵan jyrshy-jyraýlar saıysy, kórnekti aqyn О́mirzaq Qojamuratovtyń shyǵarmashylyǵyna arnalǵan músháıra ótkizý josparlanǵan. Endi Temirtaýdyń qazanynda óleń, jyr qaınaıdy, – deıdi A.Botpaıuly.
Aıtystyń aqtańgeri, professor Qoılybaı Asanov qazylar alqasyn basqarsa, Maqsat Aqanov, Dıdar Qamıev, qalalyq máslıhat depýtaty Nurhan Nurmahanov, Rýza Aldasheva syndy el azamattary ádil tórelik etti.
– Qanysh – qazaqpen egiz uǵymǵa aınalǵan tulǵa. Qazaq dese Qanysh, Qanysh dese qazaq eske túsedi. Aqyndarymyz akademıktiń ómirin jyrǵa qosyp, el bilmeıtin, estimegen beınelerin jaryqqa shyǵarýǵa tıis bolǵan-dy. Barlyǵy óz deńgeılerinde oryndap shyqty. «Arbamen jetken armanǵa» dep jyrlaǵan Syrymnyń bási basqalardan bıik tústi. Sondyqtan bas júldege laıyq kórdik, – deıdi qazylar alqasynyń tóraǵasy Q.Asanov.
Aqyndar aqıqatty aıtýdan tartynyp qalmady. Eldiń eń ózekti máselelerin, Temirtaýdyń turǵyndaryn alańdatqan dúnıelerdi de jyrǵa qosty. Qalanyń ornyn aıshyqtap, sonaý Ertisten sý tartqyzǵan Qanyshqa áli kúnge bir estelik belgi, kóshe ataýy berilmegeni de aıtylyp ótti.
«Bilmeıtin jurt áli kúnge deıin «Temirtaý orystanǵan qala» dep júr. Iá, bir kezderi solaı bolǵany da shyn. Biraq qazir qalamyz qazaqylanyp kele jatyr. Qaladan tórt birdeı aıtys aqynynyń shyǵyp otyrǵanynyń ózi qazaqy rýhtyń lebi ese bastaǵanyn ańǵartsa kerek. Buıyrtsa, aldaǵy ýaqytta Qanyshtaı tulǵaǵa ortalyq kóshelerdiń birin beremiz. Oǵan deıin ǵalymnyń qazaq eline, Temirtaýǵa sińirgen eńbegin el bile júrsin», deıdi qazylar alqasynyń múshesi, qalalyq máslıhat depýtaty Nurhan Nurmahanov.
Qala ákiminiń orynbasary Samat Zııashev aıtystyń keler jyly Temirtaý qalasynyń 80 jyldyǵyna oraı respýblıkalyq deńgeıde uıymdastyrylatynyn da jetkizdi.
Qazylar alqasynyń sheshimimen aıtystyń bas júldesi jańarqalyq Syrym Nyǵyzbaevqa buıyrdy. Syrym aqyn qaladaǵy jalǵyz qazaq gazetin ashqan Nurlyhan Qalqamanulynyń eńbegin elep, atap ótkeni rýh syılady kórermenge. I oryndy Janarys Tileýbek, II oryndy Álıhan Erǵalıev men Álıhan Nyǵmetolla, III oryndy Samat Dýman, Baısúgir Nurmuhammed, Tókenov Nurlybek ıelendi. Munymen qosa aıtysqa qatysqan barlyq aqynǵa 100 myń teńge kóleminde yntalandyrý syılyqtary berildi.
Qaraǵandy oblysy,
Temirtaý qalasy
