Talap ta, tártip te – ortaq

Basqa aımaqtan qalaǵa bilim qýyp kelgen stýdent úshin eń qajettisi – jataqhana. Alaıda orynnyń jetispeýshiliginen páter jaldap, týǵan-týystyń qabaǵyn baǵyp, úıin panalap júrgender de jeterlik. О́ıtkeni stýdent kóp, al jataqhanadaǵy oryn ádettegideı sanaýly. Onyń ústine, elimizde muq­taj stýdentti baspanamen qam­ta­masyz etýdi mindetteıtin arnaıy zań da qarastyrylmaǵan. Osy­dan bolar, bul másele jyl saıyn kóteriledi, jyl saıyn tal­qyǵa túsedi, biraq sheshimi joq.

Oǵan qosa ár ýnıversıtet, kolledj bolmasyn, jataqhana úlestirýdegi ózindik ishki erejege baǵynady. Ashyp aıtsaq, jatyn oryn, eń aldymen, memlekettik grant ıelengen 1-kýrs stýdentterine, «Altyn belgi» ıegerlerine, ata-anasynan aıyrylǵan nemese ata-anasynyń qamqorlyǵynsyz qalǵan balalarǵa, kópbalaly otbasynan shyqqan, áke-sheshesi nemese ózi múgedek stýdentterge beriledi. Ekinshi kezekte, ýnıversıtettiń qoǵamdyq jumystarynda belsendilik tanytqandar turady. Biraq osy azamattardyń ózine keıde tolyqqandy talapqa saı jaǵdaı jasalmaı jatady. Osy rette «Jastar ruhy» belsendileri jataqhanalardy jan-jaqty tekserýge kiristi. Almatylyq belsendiler aldymen Abaı atyndaǵy Qazaq Ulttyq pedagogıkalyq ýnıversıtetiniń jataqhanalaryn baqylady.

«Qazirgi ýaqytta Abaı atyndaǵy QazUPÝ-dyń 5 jataqhanasynda 2126 stýdent turady. Jataqhanaǵa muqtajdyǵy týraly ótinish bildirgenderdiń jalpy sany 3308 stýdentti quraıdy, onyń 1108-i jalǵa alynǵan jataq­hanalarda ornalasqan. Stýdentterdi oryndarmen qamtamasyz etý úshin 3 jataq­hana­men memorandým jasalǵan. Jalǵa beriletin jataqhanalar beınebaqylaý júıelerimen jabdyq­talǵan jáne qaýipsizdik norma­laryn qatań saqtaıdy. Stýdent­terdiń ál-aýqatyn baqy­laý úshin ýnıversıtet qyz­metkerleri tarapynan únemi monıtorıng júrgiziledi. Stýdentterge qolaıly bolýy úshin jataqhana aýmaǵy kompıýter ortalyqtary, kirjýǵysh mashınalar, turmystyq elektronıkamen qamtamasyz etilgen. Biraq jataqhana keńestik kezeńde salynǵandyqtan ǵımaraty eski», deıdi Almaty qalalyq «Jastar ruhy» jastar qanaty fılıalynyń tóraǵasy Ákejan Keńesov.

Oqý ornynyń jataqhanasy 2 qabattan turady. Joba bo­ıynsha ǵımarat 257 orynǵa eseptelgen. Stýdentter aıyna 12 myń teńge tóleıdi. Bir bólmede 4-6 jatyn oryn bar jáne ár qabatta as bólme orna­lasqan. Stýdentterdiń qaýip­siz­digi úshin beınebaqylaý kameralary jumys isteıdi.

«Bizdiń maqsatymyz – bireýdiń minin terý emes. Belsendi retinde qoǵamnyń áleýetin jaqsartý jolynda birlese jumys isteý. Al naýqannyń maqsaty – stýdentter úıiniń sapasyn arttyrý, sanıtarlyq normalar men qaýipsizdik sharalaryn saqtaý. Osy oraıda jas­tar qanaty tarapynan keńes berilip, jataqhana alý barysynda keleńsiz jaǵdaıǵa tap bolǵan stýdentterge jan-jaqty qoldaý kórsetiledi. Al naqty jataqhanadaǵy oryn tap­shy­­lyǵyn sheshý úshin Almaty qalasyn 2025 jylǵa deıin damytý baǵdarlamasy aıasynda «Jastar, mádenıet jáne sportty damytýdy qoldaýdyń» Jol kartasy bekitilip, qujatta jańa stýdentter jataqhanalarynyń qurylysyna erekshe kóńil bólinip otyr. Jol kartasy aıasynda 2025 jyldyń sońy­na deıin – 12 myń, 2030 jyldyń sońyna qaraı taǵy 20 myń tósektik oryn qurý josparlanǵan. Jataqhana qurylysy boıynsha jumysty tıimdi úılestirýde 2023 jyldyń naýryz aıynda ákimdik Bilim jáne ǵylym mınıstrligimen birlesip, Joba­lyq keńseni iske qosty. Iske qosylǵan sátten bastap Jobalyq keńsege 118 áleýetti ınves­tor habarlas­ty. Bul qoldaý tetiginiń tartymdylyǵyn kórsetedi. Qazir daıyndyq jumys­tary júrgizilip jatyr», dedi ­vo­lonter.

Aıta keteıik, aksııa «Amanat» partııasynyń «Jastar ruhy» jastar qanatynyń uıymdastyrýymen turaqty túrde jylyna eki ret ótkiziledi. Monıtorıng aıasynda Almaty qalalyq «Jastar ruhy» jastar qanaty fılıaly aqpan aıynyń sońyna deıin 95 jataqhanany teksermekshi.