Kilemde tájirıbeli jaýynger-sportshylarmen qatar, áskerge deıingi kúrespen aınalysqan jas sarbazdar da qatysýǵa múmkindik aldy. Jarysqa segiz salmaq dárejesinde áskerı bólim bólimsheleriniń qurama komandalary atynan 80 áskerı qyzmetshi shyqsa, onyń ishinde 18 merzimdi qyzmet sarbazy boldy.
Jarysta jaýynger-sportshylar birinshisinen sońǵysyna deıin joǵary daıyndyq pen laıyqty nátıje kórsetti. Al tóreshilik qatań tártipte, kórneki baqylaýdy jáne beınebaqylaýdy qoldanýmen ótti.
Jarysty bólim komandıriniń mindetin ýaqytsha atqarýshy podpolkovnık Aıdos Isaev ashty. Ol ujymnyń jaýyngerlik daıyndyǵy men áskerı rýhyn saqtaý úshin osyndaı sporttyq is-sharalardyń mańyzdylyǵyn aıtyp ótti.
«Birinshiliktiń basty maqsaty − áskerı qyzmetshilerdiń dene daıyndyǵyn jetildirý, olarda jeńiske degen erik-jiger men joǵary nátıjege umtylý sııaqty mańyzdy qasıetterdi damytý», dep atap ótti podpolkovnık Aıdos Isaev.
Alty saǵattyq qaısar rýh, bilek kúshi men pysyqtalǵan tehnıka jekpe-jeginde birinshiliktiń jeńimpazdary men júldegerleri anyqtaldy. Jalpy komandalyq esepte artıllerııa dıvızıonynyń áskerı qyzmetshileri úzdik nátıje kórsetip, aýyspaly kýboktyń ıegeri atandy.
Olardyń artynda ekinshi jáne birinshi motoatqyshtar batalondarynyń jaýynger-sportshylary ornalasty. Jeńimpazdar komandasy aldaǵy ýaqytta ótetin «Ońtústik» óńirlik qolbasshylyǵynyń áskerı bólimderi arasynda ótetin jarystarda mehanıkalandyrylǵan brıgadanyń namysyn qorǵaıtyn bolady.
