Foto: qazaqstan.tv
Úkimet saǵatynda Ekologııa jáne tabıǵı resýrstar jáne Tótenshe jaǵdaılar mınıstrligi bıylǵy jazda orman órtiniń aldyn alý máselesin talqylady.
Ekologııa jáne tabıǵı resýrstar mınıstri Erlan Nysanbaev tabıǵı órtterdiń aldyn alý jáne olardy joıý júıesin kúsheıtý maqsatynda Ekologııa mınıstrligi men Tótenshe jaǵdaılar mınıstrliginiń birlesken buıryǵymen tabıǵı órtterdi joıý salasyndaǵy ýákiletti organdar men uıymdardyń ózara is-qımylynyń algorıtmi bekitilgenin aıtty.
«Algorıtmde memlekettik orman kúzeti de, Aýyl sharýashylyǵy mınıstrligi qyzmetkerleri de jaǵdaıdy baǵalap, orman órti bolǵan jaǵdaıda qosymsha kúshterdi tartý týraly sheshim qabyldaıdy. Sonymen qatar algorıtm avıasııa men bólimshelerdi jumyldyrý máselesin retteıdi», dedi Nysanbaev.
Mınıstr orman órtterin sóndirý boıynsha bilim men tájirıbe deńgeıin arttyrý úshin memlekettik organdar Azamattyq qorǵaý akademııasynyń bazasynda memlekettik orman kúzeti men orman sharýashylyǵy qyzmetkerlerin oqytý baǵdarlamasy bekitilgenin málimdedi.
Sondaı-aq vedomostvolar aldaǵy jazda aýa temperatýrasy ótken jylmen salystyrǵanda joǵary bolatynyna nazar aýdardy. «Qazgıdromet» RMK-nyń aqparatyn alǵa tartqan mınıstrlikter Semeıde jaz mezgilinde bolatyn aýa temperatýrasyna erekshe toqtaldy.
«Byltyr jazda Semeıde keı kúnderi aýa temperatýrasy 40-44 gradýsqa jetti. Qazgıdromettiń málimetinshe, bıyl elimizde jazda ortasha temperatýra 19-23 gradýsty qurap, 40 gradýs jáne odan da joǵary bolady dep boljanyp otyr. Ystyq aýa raıy orman órtiniń bolý yqtımaldyǵyn joǵarylatady», dedi Tótenshe jaǵdaılar vıse-mınıstri Baýyrjan Syzdyqov.
