Foto: polisia.kz
Buǵan deıin Soltústik Qazaqstan oblysynyń polıseıleri asa iri kólemde jasalǵan zańsyz ań aýlaý faktilerin ashqany týraly habarlanǵan edi.
2023 jyldyń basynda oblystyq Polısııa departamenti uıymdasqan qylmysqa qarsy kúres basqarmasy qyzmetkerleriniń nazaryna Sibir elikterin ónerkásiptik aýqymda brakonerlik jolmen atyp alýmen aınalysatyn adamdar toby tústi.
Aqpan aıynyń sońynda VAZ-2115 avtokóligimen júrgen Petropavl qalasynyń úsh turǵyny ustaldy. Tekseris barysynda kólikten tirkelmegen tegis uńǵyly eki myltyq pen Sibir eliginiń tórt óleksesi tabyldy. Odan ári jedel-izdestirý is-sharalary barysynda saıajaı ýchaskeleriniń birinde qoıma men músheleý sehy anyqtaldy. Sol jerden eliktiń taǵy 2 óleksesi, 40 teri, 12 bas pen 119 tuıaq tabyldy.
Keıin qylmystyq topqa taǵy bir azamattyń qatysy bary anyqtaldy. Uıymdasqan qylmysqa qarsy kúres basqarmasy ustalǵan adamdar brakonerlik qyzmetpen baılanysty zańsyz bıznes qurǵanyn málimdedi. Olar uıymdasqan qylmystyq topty quryp, kóshbasshy, mergen, qasapshy júrgizýshi bolyp ózara bólip alǵan áreketterin iske asyrǵan.
«Uıymdasqan qylmystyq top qatysýshylary brakonerlik kásipti júzege asyrý úshin tirkelmegen qarý, oq-dári, gılzalar men bytyralar satyp alǵan. Al jabaıy janýarlardyń etin tanystaryna ótkizip otyrǵan. Sarapshylardyń qorytyndysyna sáıkes, memleketke 68 mıllıon teńgeden astam shyǵyn keltirildi. Atalǵan faktiler Qazaqstan Respýblıkasy Qylmystyq kodeksiniń 262-baby men 337-baby boıynsha sotqa jiberildi», delingen aqparatta.
Buryn da sotty bolǵan qylmystyq toptyń basshysy 11 jylǵa bas bostandyǵynan aıyrylsa, sybaılastary 8 jylǵa sottaldy. Úkim zańdy kúshine engen joq.
