Sýretti túsirgen – avtor
Bıylǵy qysta Bozanbaıdyń tórinde qusbegilerdiń saıysy ekinshi ret ótti. Qarashada halyqaralyq deńgeıde uıymdastyrylsa, bul joly tek Qazaqstan qyrandarynyń qyraǵylyǵyn anyqtaıtyn saıys boldy. Aqpandaǵy aq boranǵa qaramastan, elimizdiń ár óńirinen 70-ten astam búrkit pen 40-tan astam qarshyǵa jáne ıtelgi ákelindi. Bes kúnge sozylǵan saıystyń alǵashqy kúni sańqyldatyp qus kótergen qusbegiler tanystyrylyp, jerebe tartyldy. Qasqyr ishik, saptama etik, túlki tymaq kıgen búrkitshiler kele jatqanda, rýhyń asqaqtap, arqalana túsetiniń ras. Prezıdent te ulttyq sıpattaǵy dúnıeni keńinen dáripteı túsýimiz kerek dedi emes pe?! Al Bozanbaı aýyly qusbegiler ortasyna aınalyp kele jatqaly qashan. Onyń ústine elimizge ǵana emes, álemge belgili búrkitshi Aısholpan Nurǵaıypqyzynyń otbasy sonaý Mońǵolııadan osy aýylǵa qonys aýdardy. Árige úńilsek, Bozanbaıda О́zbek Manapov degen ákki qusbegi ótken. Onyń qusbegiligi týraly keńes ókimeti tusynda Japonııanyń jýrnalısteri de kelip reportaj jasaǵan eken. Soǵan qaraǵanda, Bozanbaı qut qonǵan, qus qonǵan qasıetti meken sekildi.
– Qusbegilik ónerge qyzyǵýshylyq artyp keledi. El kóleminde kóptegen jarystar ótip jatyr. Sonyń ishinde sońǵy kezde Shyǵys Qazaqstanda qusbegilik óner qanatyn keńge jaıyp keledi. Bıyl ekinshi ret elimizdiń qusbegileri Bozanbaıda bas qosyp otyr. Bul aýylda elge belgili birqatar búrkitshiler turady. Ol da Shyǵysta qusbegilik ónerdiń damýyna úlken áser etedi dep oılaımyn. Bilesizder me, bul aýylda taǵy bir kishkentaı búrkitshi qyzymyz turady. Esimi Aızere. Osynyń bárin eskerip HVII respýblıkalyq búrkitshiler chempıonatyn Bozanbaıda ótkizýdi jón kórdik. Jarys jeńimpazdary Astanada ótetin dúnıejúzilik kóshpeliler oıynyna qatysady, – deıdi
QR «Qusbegilik» búrkitshiler federasııasynyń vıse-prezıdenti Baǵdat Múptekeqyzy.
Jarys nátıjesinde, sonaý Atyraýdan at arytyp kelgen qusbegi Sarmat Ábdikárimulynyń qyrany jarystyń chempıony atandy. Ekinshi oryndy almatylyq Aıan Seıitjan qanjyǵasyna basty. Júldeli úshinshi oryndy pavlodarlyq Alan Ysqaqovtyń búrkiti tegeýringe ildi. Sonymen qatar qarshyǵa men ıtelgi ushyrǵandardyń da júldeleri anyqtaldy.
– Boran qyrannyń qanatymen ere júretin tabıǵı qubylys. Qar, boran ańshylar úshin qıyndyq emes. Qalaı bolǵanda da naǵyz qyrandar fınalǵa shyǵyp, jeńiske jetti. «Shyǵys Altaı» búrkitshiler federasııasyn birneshe jyl basqaryp, óńirde qusbegiliktiń damýyna ózindik úlesimdi qostym. Endi Shyǵys pen Abaı bólinip jatyr. Aldaǵy ýaqytta da ákimdik qoldaý kórsetip otyrsa, mundaǵy búrkitshiler jemisti jumys isteıdi, – dep, búrkitshi Táttimbet Kápuly senim bildirdi.
Bozanbaıǵa jańa qonys aýdarǵan qusbegi Nurǵaıyp Yrysulynyń aıtýynsha, bolashaqta bul aýylda búrkitshiler ortalyǵy ashylady. Ortalyq qusbegilikpen ǵana shektelmeıdi, sondaı-aq ulttyq ónerdi, salt-dástúrdi nasıhattaýǵa baǵyttalady.
Sóıtip, elimizdiń túkpir-túkpirinen jınalǵan júzge jýyq qusbegi Qalba sileminde qyrandaryn qalyqtatyp qaıtty. Iá, qolǵa qyran qondyrǵan búrkitshiler qus qana kóterip júrgen joq, ulttyq rýhty da bıiktetedi.
Shyǵys Qazaqstan oblysy,
Ulan aýdany,
Bozanbaı aýyly
