foto: kazakhfilmstudios.kz
Ol 1914 jyly 15 aqpanda Pavlodar oblysynda dúnıege kelgen. Semeı muǵalimder tehnıkýmynda oqyp júrgende, Almatydaǵy Qazaq drama teatryna shaqyrylyp, 1933 jyldyń maýsym aıynda teatrǵa jumysqa qabyldanady.
Sh.Aımanov alǵashynda Gramofonov (K.Pogodın «Meniń dosym»), Qodar, Aldar kóse (Sh.Qusaıynov «Aldar Kóse»), Isataı (I.Jansúgirov «Isataı - Mahambet»), Kassıo (Ý.Shekspır «Otello») rólderin oınady. Kóp uzamaı Tıhon, Velıkanov (A.Ostrovskıı «Talanttar men tabynýshylar», «Naızaǵaı»), Shadrın (K.Pogodın «Myltyqshy adam»), Kıdd (B.Lavrenov «Amerıka daýysy»), Brett (Dj.Goý, A.Dıýsson «Tereń tamyrlar»), Hlestakov (N.Gogol «Revızor»), Kazansev (M.Áýezov «Túngi saryn») sııaqty klassıkalyq rólderdi somdady.
1953 jyly teatrdan kınoǵa aýysady. О́z mamandyǵynyń has sheberi retinde Sháken Aımanov óz keıipkerlerin somdaǵanda kóztartar is-qımyldar jasaýmen qatar, onyń ishki dúnıesin ashýǵa tyrysatyn. Rejısserlik qyzmeti barysynda Aımanov kınofılm mazmunyn jan-jaqty ashyp, oı tolǵamdarmen qyzyqtyryp, kórkemdik jaǵynan sýrettegen. Daryndy akter, sheber rejısser qazaq kınosynyń negizin qalaýshylardyń biri bolyp, qazaq óneriniń jandanyp, damýyna úlken úles qosty.
Sh.Aımanov Qazaqstan Kınematografıster odaǵyn uıymdastyrýǵa qatysyp, 1958-70 jyldary odaq basqarmasynyń 1-hatshysy qyzmetin atqardy. 1972 jyly Almaty qalasynyń kóshesi jáne 1984 jyly «Qazaqfılm» stýdııasy Aımanov esimimen atalady. Ol turǵan úı men kınostýdııa ǵımaratyna memorıaldyq taqta ornatyldy.
Sháken Aımanovtyń «Dala qyzy» (K. Gakkelmen birge), «Mahabbat týraly ańyz» (K. Gakkelmen birge), «Biz osynda turamyz» (M. Volodarskıımen birge), «Bizdiń súıikti dáriger», «Bir aýdanda», «Án shaqyrady», «Jol toraby», «Aldar kóse», «Atameken», «Taqııaly perishte», «Atamannyń aqyry» syndy fılmderi bar.
