Foto: MQIA baspasóz qyzmeti
Memlekettik qyzmet isteri agenttiginiń tóraǵasy Darhan Jazyqbaı Dýbaı qalasynda ótken Dúnıejúzilik úkimetter sammıtine qatysty. Sammıt aıasynda memlekettik sektordaǵy personaldyń tıimdiligi men básekege qabilettiligin arttyrý, HR prosesterin odan ári sıfrlandyrý máseleleri talqylandy.
Darhan Jazyqbaı sheteldik áriptesterine Qazaqstanda memlekettik qyzmet júıesin damytýǵa baǵyttalǵan – «adamǵa baǵdarlanǵan» servıstik sıpattaǵy memlekettik apparatty qalyptastyrý sharalary týraly aıtty.
Ol memlekettik qyzmette adam resýrstaryn jetildirý, HR quraldardy engizý, «e-Qyzmet» júıesi negizinde irikteý prosesteri men personaldy basqarýdy sıfrlandyrý boıynsha agenttikpen júzege asyrylyp jatqan jobalar men bastamalarǵa da toqtaldy.
MQIA tóraǵasy Birikken Arab Ámirlikteriniń laýazymdy tulǵalarymen ekijaqty kezdesýler ótkizdi. Sonyń nátıjesinde memlekettik basqarýdy transformasııalaý salasyndaǵy tájirıbe almasý boıynsha segiz úkimetaralyq baǵyttyń biri «Áleýetti arttyrý jáne kóshbasshylyq» aıasynda alǵashqy «Basqarýshylardyń kóshbasshylyq baǵdarlamasy» iske qosyldy.
Baǵdarlama boıynsha oqytý bıylǵy jyldyń naýryz aıynan bastalady. 30 memlekettik qyzmetshi oqytylady dep josparlanǵan.
Sonymen qatar atalǵan baǵyt aıasynda memlekettik qyzmetshiler úshin «Executive Leaders Program», «Future Leaders Program», «Youth Leaders Program» atty úsh baǵdarlama boıynsha tegin onlaın oqytý júrgiziledi. Sondaı-aq baǵdarlamalarda Prezıdent janyndaǵy Memlekettik basqarý akademııasynda jáne BAÁ-de bir aptalyq oqý ótkizý qarastyrylǵan.
Kezdesý sońynda taraptar memlekettik qyzmetshilerge arnalǵan birlesken bilim berý baǵdarlamalaryn júzege asyrýdaǵy yntymaqtastyqty odan ári damytýǵa daıyn ekenin bildirdi.
