Foto: khabar.kz
Kólik keptelegi Aqtóbe qalasynyń «Raýan» shaǵyn aýdanynan bastalyp, 226 shaqyrym jerdegi Qarabutaq aýylyna deıin sozylyp ketken. Ásirese Qarabutaq eldi mekeniniń janynda 15 shaqyrym keptelekten tranzıttik kólikter ne ári, ne beri shyǵa almaı qalǵan. О́tken táýlikte osy jerdegi keptelistegi júrgizýshiler arasynda janjal tutanyp, arty tóbeleske ulasty. Bulardyń kópshiligi – Reseı, О́zbekstan, Tájikstan, Qyrǵyzstan, Belarýstiń aralyǵyna taýar tasıtyndar. Respýblıkalyq mańyzy bar tasjoldyń boıynda ne as ishetin oryn, ne aıaq sýytatyn jibi túzý kempıngtiń joqtyǵy, beketterde janar-jaǵarmaıdyń bolmaýy jurttyń júıkesin tozdyrdy. Respýblıkalyq mańyzy bar tasjol óte tar, birneshe kólik qatar júrip óte almaıdy. Jolústi boran taý-taý bolyp úıip tastaǵan qar. Bul kúnderi jol tazalap júrgen tehnıka kórinbedi. Osylaısha, tabıǵattyń tosyn minezi joldy kútip ustaýǵa jaýapty «QazAvtoJol» mekemesine de ádil baǵa berdi.
300 shaqyrymǵa sozylǵan kólik keptelegine baılanysty Aqtóbe oblysy ákimdigi bylaı dep túsinik berdi: «Aýa raıynyń qolaısyzdyǵyna baılanysty Aqtóbe qalasynan Qarabutaq aýylyna deıingi jol ýchaskesinde tranzıttik aýyr júk keptelegi baıqaldy. Alaıda júk kólikteri atalǵan ýchaskede 10 kúnnen asa qańtarylyp tur degen shyndyqqa janaspaıdy. Aqtóbe – Qarabutaq baǵyty boıynsha kólik qozǵalysyna shekteý joq, jol ashyq. Alaıda aýa raıynyń qolaısyzdyǵyna jáne kólikterdiń keptelisine baılanysty qozǵalys baıaý júrip jatyr. Aqtóbe oblysynda 4-12 aqpan aralyǵynda tótenshe jaǵdaı kezinde joldyń ashylýyn kútip turǵan barlyq aýyr júk kóligi keptelek aımaqtarynan sátti ótti», dep habarlaıdy. Munymen bir mezette «QazAvtoJol» fılıalynyń basshysy Aıbol Danaǵulov aqpannyń 15-inde Qarabutaq aýylynan Hromtaýǵa deıingi aralyqta turyp qalǵan 208 júk kóligi kolonnasy qozǵala bastap, bir saǵattyń ishinde Hromtaý – Qarabutaq – Hromtaý baǵytynan 249 kólik júrip ketti», dep málimdedi.
Aqtóbe oblysy
