Foto: AbaiNews/t.me
AbaiNews Semeıde aspaly kópirdiń deformasııalyq jiginiń ornynda jaryqtar paıda bolǵanyn habarlady.
Ertisti kesip ótetin kópir ústindegi jaryqtardy kórgen turǵyndar alańdaýly. Jergilikti polısııa vızýaldy tekserý júrgizgen.
«Polısııa qyzmetkerleri óz quzyreti sheginde kópirdiń jaı-kúıine vızýaldy tekseris júrgizdi. Tekserý qorytyndysy boıynsha ákimdikke deformasııalyq jikti muzdan tazartý qajettigi týraly uıǵarym jiberildi. Deformasııalyq jiktiń ashylyp ketýine aýa temperatýrasynyń tómendeýi sebep bolǵan», dedi Abaı oblystyq polısııa departamentiniń ókili.
Abaı oblysynyń ákimdigi aspaly kópirdegi sańylaýlar kólik qatynasyna kedergi keltirmeıtinin alǵa tartyp, kópirdiń qulaýyna qatysty qaýip joq dep baǵamdady.
«16 aqpanda aýa temperatýrasy -29 gradýs bolǵan kezde Jolaýshylar kóligi jáne avtomobıl joldary bóliminiń ókilderi aspaly kópirdegi deformasııalyq jikter men kópirdiń kózge kórinetin tirekteriniń qurylymdaryn vızýaldy tekserdi. Nátıjesinde deformasııalyq jik qyrlarynyń arasynan №1 tirekten 70 mm-deı jáne №10 tirekten 60 mm-deı sańylaý anyqtaldy. Kópir tireginiń jaǵdaıy qanaǵattanarlyq dep baǵalandy, kópirdiń qulaý qaýpi anyqtalǵan joq», dedi ákimdik.
Alaıda ákimdik ókilderi kópirdiń tehnıkalyq jaǵdaıy táýlik boıy baqylaýda bolatynyn málimdedi.
