Sýretti túsirgen – Dmıtrıı EROFEEV
Atalǵan máselege qatysty oblys ákiminiń orynbasary Áset Qanaǵatov ınvestor kompanııanyń ókilderimen kezdesý ótkizdi. Jıynda ol elimizde, sonyń ishinde Jetisý óńirinde ekonomıkanyń eleýli damýynyń nátıjesinde elektr jáne jylý energııasyna degen qajettilik ósip kele jatqanyn jetkizdi. Soǵan baılanysty «Basqýat Energo» JShS usynǵan bul mańyzdy joba oblys ákimdigi tarapynan qoldaý tapqan. Joba týraly keńinen tanystyrý úshin oblys ákiminiń orynbasary alǵashqy sózdi «Basqýat Energo» JShS dırektory Arman Otarbaevqa berdi. Seriktestik basshysynyń aıtýynsha, Taldyqorǵanda gaztýrbınalyq stansa salý mejelengen. Joba úsh kezeńnen turady, ıaǵnı 2024-2025 jyldary iske asyrylmaq.
«Qurylysqa qajetti jer ýchaskesi bar, qazir geologııalyq-geodezııalyq jumystar júrgizilip jatyr. Zertteý jumystary aıaqtalǵan soń, naýryz aıynyń basynda birinshi kezeńniń qurylysyn bastaýdy josparlap otyrmyz. Osy jyldyń mamyr-qazan aılarynda jobanyń alǵashqy kezeńi aıaqtalýǵa tıis. Al maýsym-qazan aılarynda ekinshi kezeńniń qurylysyn da qosa júrgizemiz. 2024-2025 jylǵy jylytý maýsymyna úlgerip, bastapqy meje – 25 Gkal jylý energııasyn óndirýge bar kúsh-jigerimizdi jumsaımyz. Joba 2025 jyldyń qazan aıyna deıin tolyq aıaqtalady dep josparlanǵan», dedi A.Otarbaev.
Taldyqorǵan qalasy ákiminiń orynbasary Qýanysh Seıtimbetov óz sózinde osy jobaǵa baılanysty ákimdikte birneshe otyrys ótkizilgenin, sonyń nátıjesinde qurylysqa qajetti jer ýchaskesiniń nysanaly maqsatyn ózgertý máselesiniń oń sheshilgenin, «Basqýat Energo» JShS-nyń «Basqýat» bas qazandyǵymen ózara birigip jumys isteý týraly kelisim jasalǵanyn qysqasha baıandady. Sol sııaqty oblystyq energetıka jáne turǵyn úı kommýnaldyq sharýashylyǵy basqarmasynyń basshysy Aıdos Beketaev «Basqýat Energo» JShS-nyń jobasyna jáne Tekeli qalasy men Eskeldi aýdanynyń tabıǵı gazǵa qajettiligin tıisti kólemde qamtamasyz etý úshin «Taldyqorǵan» AGRS-nyń qýatyn 200 myń km 3/saǵatqa jetkizý qajettigi týyndaıtyndyqtan, atalǵan AGRS-ke jańǵyrtý jumystaryn júrgizýdi usyndy.
Jalpy ekonomıkanyń, sonyń ishinde óndiris pen qurylys sııaqty negizgi salalardyń qarqyndy ósýine baılanysty energııaǵa degen suranystyń artýy, energetıka nysandaryndaǵy jabdyqtardyń tozýy, rezervtik syıymdylyq qorynyń shekteýligi bul salaǵa edáýir kólemde ınvestısııa salýdy qajet etip otyrǵandyqtan, gaztýrbınalyq stansa salý jobasynyń Jetisý óńiri úshin mańyzy zor. Atap ótsek, «Basqýat Energo» JShS jańa nysan salý barysynda 3 gaz-porshendi týrbına, eki gaz týrbınasyn, 4 kádege jaratýshy qazandyq ornatady. Jobany iske asyrý negizinde jalpy kólemi 80 MVt elektr energııasyn, 100 Gkal jylý energııasyn óndirý kózdelgen. Bul óz kezeginde Taldyqorǵandy jylý energııasymen qamtyp otyrǵan «Basqýat» qazandyǵynyń qoldanystaǵy jylý berý júıesiniń qýatyn arttyrýǵa úlken yqpal etpek. Jobanyń quny – 37 mlrd teńge.
Jylý degennen shyǵady, kúni keshe Eskeldi aýdanyna qarasty Aldabergenov aýylyna gaz qubyryn tartý jumystary aıaqtalyp, eldi mekenge kógildir otyn berildi. Gaz qosý rásimine arnalǵan saltanatty sharaǵa Eskeldi aýdanynyń ákimi Eldos Ahmetov, oblystyq energetıka jáne turǵyn úı-kommýnaldyq sharýashylyq basqarma basshysynyń orynbasary Danııar Ysqaqov, merdiger kompanııa ókilderi jáne aýyl turǵyndary qatysty.
Aýdan basshysy óz sózinde turǵyndardy quttyqtap, qazirgi tańda halyqtyń birinshi kezekte sheshýdi qajet etetin máselelerine, sonyń ishinde tabıǵı gazben qamtý máselesine basymdyq berilip otyrǵanyn atap ótti. Onyń aıtýynsha, Eskeldi aýdanynda 33 eldi meken bar, onyń 21-i gazdandyrýǵa jatady. Búginde aýdanda Aldabergenov aýylyn qosa alǵanda 5 eldi meken gazdandyrylǵan. Olarda jalpy sany 6 200-ge jýyq abonent bar. Kelesi kezekte Baqtybaı aýylyn gazǵa qosý josparlanǵan.
Qazir aýdannyń 11 aýylynda gaz tartý jumystary júrgizilip jatyr. Bul eldi mekenderdi gazǵa qosý jyl sońyna deıin kezeń-kezeńimen iske asyrylady. Sonymen qatar 3 eldi mekendi gazdandyrýdyń jobalyq-smetalyq qujattamasy ázirlenip jatyr. Sonyń nátıjesinde 2025 jyldyń sońyna deıin aýdannyń 41 myń turǵyny bar 21 eldi mekeni tabıǵı gazǵa qol jetkizedi.
4 myńnan asa turǵyny bar Aldabergen aýylyna tartylǵan gaz jelileriniń uzyndyǵy – 107 km. Jobanyń quny – 756,5 mln teńge. Gaz qubyrynyń qurylysyn «Kompanııa GazStroı» JShS júrgizdi.
Oblystyq energetıka jáne TÚKSh basqarmasynyń málimetinshe, 2023 jyly jalpy somasy 22,9 mlrd teńgege gaz taratý jelilerin salýdyń 22 jobasy iske asyrylyp, sonyń nátıjesinde 1061 km gaz jelileri tartylǵan. Sonyń ishinde 11 joba boıynsha jumystar aıaqtalyp, gaz berildi, al 11 joba 2024 jylǵa aýyspaly. Buǵan qosa bıyl oblystyń taǵy 22 eldi mekeninde gazdandyrý jumystary bastaldy. Jalpy, oblys kóleminde búginde 319 myń adam gazǵa qol jetkizdi, ıaǵnı halyqtyń gazben qamtylý deńgeıi – 45,6 paıyz.
Jetisý oblysy
