Sýretti túsirgen – Dmıtrıı Erofeev
Kásip ıesi Toqa Qarqyn – tarıhı otanyna oralǵan kóp qazaqtyń biri. Birneshe jyl boıy túrli salada baǵyn synap, aqyry óz isin ashýǵa bel baılaıdy. Naryq suranysyn zertteı kele, ol turmystyq hımııa bıznesimen aınalysýdy jón kórdi. Bızneste tájirıbesi azdyǵy da kásip bastaýyna kedergi keltirmedi. Búkil úderisti zerttep, eń aldymen qajetti qural-jabdyqtar satyp alyp, qolaıly bólmeni jalǵa aldy. Zamanaýı 3 stanok ornatyp, 4 túrli ónim shyǵara bastady.
«Qural-jabdyqtardy Qytaıdan satyp aldym. Úılestirýshiler jabdyqtardy ornatyp, qalaı qoldanýdy úıretti. Qazir «Taza» brendimen ydys jýýǵa arnalǵan gel, kir jýýǵa arnalǵan gel konsentratyn jáne «Akzhol» avtokólik kosmetıkasynyń shyny jáne kólik jýýǵa arnalǵan eki túrin shyǵaramyz. Kásiporynnyń qýattylyǵy táýligine 10 tonna daıyn ónim shyǵarýǵa jetedi. Ázirge 1 tonna óndirip jatyrmyz. Kásipornymyz ótken jyldyń jeltoqsan aıynyń sońynda ashylǵandyqtan, bul bastamasy deýge bolady. Saýda-sattyqty jolǵa qoıdyq. Bizde jumys isteıtin 6 qyzmetkerdiń 2-eýi osy baǵytty júrgizedi. Ázirge ónimderimiz Taldyqorǵan men Almatydaǵy túrli shaǵyn dúkende satylyp jatyr. Al kásiporyndaǵy ortasha jalaqy 200 myń teńgeni quraıdy», deıdi «Qarqyn Grýpp» JShS dırektory T.Qarqyn.
Kásiporynda ónim shyǵarýmen qatar sol ónimderge arnalǵan ydystar da jasalady. Iаǵnı táýligine 6 myń dana qýattylyǵy bar arnaıy stanokta plastıkalyq bótelkeler shyǵarylady. Kásipker barlyq ónimge qajetti shıkizatty, onyń qaptamasyna arnalǵan óndiris qajettilikterin Almatydan satyp alady. Máselen, osyndaı ıngredıentterdiń 15 túri jetkiziledi, onyń ishinde karton qoraptary da bar.
«О́nimderimizdiń sapasy belgili brendterden esh kem emes, solaı bola tura áldeqaıda arzan, óıtkeni shıkizattyń basym bóligi – otandyq ónim. Máselen, 2 lıtr suıyq untaqtyń zaýyttyq baǵasy – 1 200 teńge, ydys jýatyn suıyqtyń 1,2 lıtri – 800 teńge. Bizdiń suıyq untaqty mashınaǵa da, qolmen jýǵanda da qoldanýǵa bolady. Ol túrli daqtardy jaqsy ketiredi, jaǵymdy ısi bar, gıpoallergendi. О́nimderdi satyp alyp jatqan, qoldanyp kórip, sapasyna kóz jetkizgen tutynýshylarymyz da óz pikirlerin basqalarmen bólisedi dep senemiz. О́nimderimizdi áleýmettik jeliler arqyly nasıhattap, aqparattardy Instagram jelisindegi @karkyn.grup paraqshasyna salyp otyramyz», deıdi kásiporyn dırektory.
Kásipker munymen toqtap qalmaı, jaqyn arada sheberhanasyna arnap jeke ǵımarat salyp, shyǵarylatyn ónim túrlerin keńeıtýdi armandaıdy.
«Jeke ǵımaratymyz bolsa ǵoı. О́ıtkeni úı-jaıdy jalǵa alý – edáýir shyǵyn. Qurylys úshin bizge jer telimi kerek. Bul jaǵynan memlekettiń qoldaýyna júginemiz. Turǵyndardy qoljetimdi baǵada kúndelikti turmysqa qajetti sapaly ónimdermen qamtamasyz etýdi jalǵastyramyz», dedi kásipker.
Jetisý oblysy
