Saltanatty jıynǵa Raıhan Qalıoldına, Rahman Omarov, Maral Anarbek, Asylbek Boranbaev syndy belgili óner maıtalmandary jáne T.Júrgenov atyndaǵy kolledj stýdentteri men Ál-Farabı atyndaǵy №145 mektep-gımnazııasynyń ustazdary men oqýshylary qatysty.
Talantty rejısser Sháken Aımanov óz halqymen óz Otanynyń óner jolyndaǵy Alataýdaı aqıyq murageri retinde esimi tarıhta qalǵan tulǵa. Onyń shyǵarmashylyq tulǵasynyń qalyptasýyna qazaq óneriniń qara shańyraǵy – Qazaq drama teatrynyń sahnasynda shyńdalǵan, tolysqan jyldar tereń iz qaldyrdy.
«Aımanovtyń alǵashqy ustazdary, tálimgerleri – aǵa býyn áriptester, ataqty akterler Qalıbek Qýanyshbaev, Elýbaı О́mirzaqov, Serke Qojamqulov, Qurmanbek Jandarbekovter boldy. Rejısserlik jumystarynyń janrlyq, taqyryptyq aýmaǵyna úńilsek, onyń keń aýqymdy, alýan túrli ekenin baıqaımyz. Atap aıtqanda, «Bizdiń súıikti dáriger», «Taqııaly perishte», «Aldar Kóse» halyqtyq kınokomedııalary, óz dáýirinde kórermenniń ystyq yqylasyna bólense, «Bir aýdanda», «Biz osynda turamyz» kınohıkaıattary qalyń kórermenderiniń kóz qýanyshyna aınalǵan edi», dep eske aldy kesh qonaqtary.
Eske alý keshinde, Sh.Aımanovtyń izin jalǵap kele jatqan sahna sańlaqtary aıtýly tulǵanyń bolmysy jaıynda, uly rejısserdiń kásibı sheberligi, uıymdastyrýshylyq qabileti, adamı qasıetteri jóninde, sonymen qatar, ózderiniń óner jolyna kelý jolyn da keńinen sóz etti.
Talantty akter Asylbek Boranbaı Sháken Kenjetaıulynyń ómirde eshkimge uqsamaıtyn, ashyq-jarqyn, erekshe jomart adam bolǵanyn, jurtpen aralasqandy, kez kelgen jıylystyń aıaǵyn kishigirim toıǵa, oıyn-saýyqqa aınaldyryp jiberetin qasıetterin basa aıtty.
Kezdesý sońynda stýdentter men oqýshylar tarapynan kesh qonaqtaryna suraqtar qoıylyp, ádemi jaýaptardyń kýási boldyq.
Kesh sońynda kitaphana meńgerýshisi Janar Jaıyqqyzy qonaqtarǵa syılyqtar tabystady.
