Foto: THE SHARDARA ARMSPORT TEAM/facebook
Armrestlıngti aıtqanda Shardara aýyzǵa qatar iligedi. Shalǵaıda jatqan aýdannyń abyroıyn qol kúresten shyqqan chempıondar sharyqtatyp júr. «Shardara Armsport» klýbynan 26 jyl ishinde 107 - álem chempıony, 31 - Álem kýbogynyń ıegeri, 327 - Azııa chempıony top jardy. Sharbolat jigitterdiń dúbirli dodalardy dúr silkindirýi bilikti ustazǵa shákirt bolýymen baılanysyp jatyr. Almatyda tutanǵan arman alaýy Arman Qarsybaev aýylyna kelgende áste basylmady. Bastapqyda Arman Romanulynyń aýlasynda negizi qalanǵan qol kúres úıirmesi «Shardara Armsport» klýbyna ulasty. Aýladan bastalǵan qyzyǵýshylyqtyń qarqyndy damyǵanyna aýdannyń 1 kóshesinen 18 álem chempıony shyqqany aıǵaq. Jeńimpazdardyń qanatyn qataıtyp, baptaǵan ustazdan jattyǵý jıyndary men daıyndyq qalaı ótetinin, «Shardara Armsport» klýbynyń bet alysyn suradyq.
«Bizge jaqsy chempıonnan buryn, jaqsy adam shyǵarý mańyzdy»
- Bıyl Shardara Armsport klýbynyń negizi qalanǵanyna 26 jyl toldy. Osy ýaqyt aralyǵynda shákirtterińizdiń bási bıik 5 baǵyndyrǵan belesin atańyzshy?
- Iá, bıyl «Shardara Armsport» klýbynyń qurylǵanyna 26 jyl tolyp otyr, osy jyldar ishinde jeńiske jetken árbir sportshymnyń baǵyndyrǵan belesi men úshin óte úlken qýanysh. «Shardara Armsport» klýbynyń negizin 1997 jyldan bastap qaladyq. Sol ýaqyttan beri Qazaqstan, Azııa jáne Álemdik birinshilikterde el abyroıyn qorǵap kelemiz. Qazirgi ýaqytta aýdanymyzdan:
- 107 - Álem chempıony;
- 106 - Álem chempıonatynyń júldegeri;
- 31 - Álem kýbogynyń ıegeri;
- 327 - Azııa chempıony;
- 75 - Azııa kýbogynyń ıegeri;
- 500 - Qazaqstan chempıony;
- 85 - sportshy Halyqaralyq týrnırlerdiń jeńimpazy;
- 75 - Qazaqstan Respýblıkasynyń Halyqaralyq dárejedegi sport sheberi jáne 130 - Qazaqstan Respýblıkasynyń sport sheberi shyqty. Sondaı-aq 6 bapker «Qazaqstanǵa eńbegi sińgen jattyqtyrýshy» jáne 5 sportshy KR Eńbek sińirgen sport sheberi atandy. Meniń oıymsha júldeli jetistik tolymdy tárbıeden bastalady. Sportta da biz osy ustanymǵa júginemiz. О́ıtkeni, bizge jaqsy chempıonnan buryn, jaqsy adam shyǵarý mańyzdyraq. Bos ýaqytyn qol kúreske arnap, ter tókken, eńbekten qashpaǵan árbir shákirtimniń kók týdy bıikte jelbiretken jetistigi men úshin mártebe.
- Chempıondar sherýi toqtamaǵan shaǵyn aýdan Shardarada jarystarǵa daıyndyq, oqý-jattyǵý jıyndary qalaı ótedi?
- «Shardara Armsport» klýbynda oqý-jattyǵý jıyny turaqty túrde ótedi. Sportqa den qoıyp, damytýǵa memleketimizdiń sport salasyna kórsetken qarqyndy qoldaýy da septesip tur. Árbir jarys aldynda kúnine eki ret tańerteń jáne keshki ýaqytta oqý-jattyǵý jıyny ótedi. Jattyǵý barysynda sportshylardyń ýaqtyly uıyqtaýy, deneni shynyqtyrýy, rejımmen tamaqtanýy syndy faktorlarǵa da erekshe mán beremiz.
- Chempıondardy baptaıtyn bapkerler týraly aıtyńyzshy. Olar tájirıbesin qalaı shyńdaıdy?
- Qazirgi tańda klýbymyzda 30-dan asa jattyqtyrýshy jumys isteıdi. Onyń barlyǵy buryn qol kúrespen kásibı aınalysqan jáne áli kúnge deıin halyqaralyq saıystarda baq synap júr. Olar ózderi de osy sport túrimen aınalysatyndyqtan tájirıbeni alystan izdemeı, bir-birimizben aqyldasqan túrde tájirıbeni tolyqtyryp, keńesip shyńdap otyramyz.
«Basty básekelesimiz – Eýropalyq jigitter»
- Shetelden Shardaraǵa arnaıy at basyn buryp, tájirıbe tolystyrýǵa keletin qol kúresshiler kóp pe? Basym bóligi qaı elder?
- Shardaradan chempıondardyń kóp shyǵýy álem nazaryn aýdarmaı qoımaıdy. Sondyqtan Shardaraǵa Koreıa, Malaızııa, Polsha, О́zbekstan, Horvatııa, Fransııa, Latvııa, Amerıka Qurama Shtattarynan jáne taǵy basqa kóptegen memleketten sportshylar kelip, tájirıbe tolystyrýǵa yntaly. Olarǵa qazaqtyń qonaqjaılyǵyn kórsetip, jattyǵý zalyndaǵy chempıondarmen birge jattyǵý jasaýǵa múmkindik beremiz. Olardyń basym kópshiligi bizdiń sportshylardyń tártibi men boıyndaǵy jigerin kórip tańdanysyn jasyrmaıdy. Olardyń Shardaraǵa arnaıy at basyn buryp, bizdiń tájirıbemizge qyzyǵýshylyq tanytýy bizge ǵana emes, búkil elimiz úshin mártebe dep bilemin.
- Shardaralyq shymyr, qurysh bilek jigitterdiń álemdik dodadaǵy basty básekelesteri qaı eldiń ókilderi?
- Qazirgi tańda qol kúres álemde armrestlıng ataýymen kóptegen elde qarqyndy damyp jatyr. Onyń ishinde Eýropa elderiniń sportshylary óte myqty qarsylastar dep aıta alamyn. Negizi, kez kelgen sportshynyń ishki jáne syrtqy daıyndyǵy myqty bolsa, eshqandaı qarsylas ýaıymdatpaıdy.
«Qazaqstannyń ár óńirinde sporttyń bir túrin tyńǵylyqty damytý kerek»
- BAQ-qa bergen bir suhbatyńyzda «Qazaqstannyń ár óńirinde bir sport túrin damytsa, el sporty qaryshtap damıtyn edi» dep pikir bildirgen edińiz. Osy baǵytta Shardara aýdanyna qarasty aýyldarda qol kúres úıirmeleri úılestirilip jatyr. Olardyń jumysy qalaı retteledi, qandaı qoldaý kórsetilip jatyr?
- Bizdiń aýdanymyzda qol kúres sporty jyldan jylǵa keń etek jaıyp, dınamıkaly túrde damyp keledi. Búgingi kúni aýdanǵa qarasty Qosseıit aýylynda qol kúres úıirmesi jumys jasap tur. Ol jerge arnaıy jattyqtyrýshy bólip, kerekti jattyǵý qural jabdyqtarymen de kómek berip turamyz. Qazir Qosseıitte 100-ge tarta bala jattyǵady. Olardyń arasynan da 7 álem chempıonatynyń júldegeri, 10 Azııa chempıony, 5 júldeger men 10 el chempıony top jardy. Eger aýdanǵa qarasty basqa eldi mekenderde qolkúrespen aınalysýǵa nıet bildirip jatsa árqashan kómektesýge daıynbyz. Men árkez Qazaqstannyń ár aýdany belgili sport túrimen tyńǵylyqty aınalyssa, elimizde buqaralyq sporttyń kókjıegi keńip, deni saý, deńgeıi bıik urpaq ósip shyǵýyna arqaý bolatynyn aıtýdan jalyqpaımyn.
- Qyzdar arasyndaǵy qol kúreste de serpin bar. Chempıon qyzdar týraly aqpar berseńiz?
- Durys baǵamdaǵan ekensiz. Bizdiń klýbta qyzdar da osal emes, arýlar arasynan da álem chempıony atanǵandar jetkilikti. Sonyń biri - Jazıra Aqbaeva Álemniń eki dúrkin chempıony bolsa, Qalyqulova Merýert - álem chempıony ári qazirgi tańda qyzdar quramasyn jattyqtyrýmen aınalysady. Jalpy sport klýbymyzda 40-qa jýyq qyz sheberligin shyńdaıdy. Olardyń ár qaısysy da óz salmaqtarynyń sańlaqtary.
- Shardarany armsport derjavasy deńgeıine jetkizýdegi sizdiń eńbegińizdi el biledi. Búginde osy aýdannyń tizginin ustadyńyz. Shardarada taǵy qandaı sport túrlerin damytý josparda bar?
- Aıta keterligi «Shardara Armsport» klýbynyń aýlasynda qol kúres sportynan bólek gir kóterý sporty (álem chempıondarymyz bar), dzıý do, taekvon-do, karate, boks, aýyr atletıka, jeńil atletıka (ıadro laqtyrý jáne naıza laqtyrý), paýerlıftıng, asyq atý, toǵyzqumalaq jáne shahmat sport túrleri bar. Biz atalǵan sport úıirmelerin ashý, talaptylardy tartý arqyly osy sport túrleriniń de aýdanda qaryshty damýyna múddelimiz. Aldaǵy ýaqytta atalǵan árbir sport túrinen álemdi jáne olımpıada shyńdaryn baǵyndyratyn sportshylar shyǵady degen úmittemin. Meniń oıymsha, barlyq sportta elge degen erekshe sezim, patrıottyq rýh bolǵanda baǵynbaıtyn tuǵyr bolmaıdy. Osy ustanymdy uran etkender utylmaıdy.
- Áńgimeńizge raqmet!
