Sýretterdi túsirgen – Rýslan Kadyrov
Búginde atalǵan klýb prezıdenti, jazýshy Esbolat Aıdabosyn jastarmen qatar úlkenderdiń de shyǵarmashylyq keshiniń ótýine járdemdesip júr. Respýblıkalyq deńgeıde ádebı baıqaýlar ótkizip, arnasyn keńitip, aýqymyn ulǵaıtyp alǵan «Janr» ádebı klýbynyń bul jolǵy keshi burynǵydan ózgeshe órnek tapty. Kompozısııaǵa qurylyp, on eki aqynnyń óleńi oqylyp, sol shaıyrlardyń sózine jazylǵan on eki án oryndalǵan keshte shynymen de júrek jyrlap, án áýeledi.
««Janr» ádebı klýbynyń taǵy bir jańasha bastamasy óz jemisin berdi. Bul ózi Jetisý rýhanııat áleminde merekeli kún boldy. «Týǵanda dúnıe esigin ashady óleń, óleńmen jer qoınyna kirer deneń», degen Abaı atamnyń aıtqany ras bolsa, bul óleń degen álemnen ólgende baryp bir-aq ajyraıtynymyz haq. Dıirmenniń tasyndaı shyr aınalǵan dúnıede kúıbeń tirliktiń ıleýinen bir sát alystap, kóńilimizge shýaq tógetin, janymyzǵa qýat beretin kesteli jyr men áýezdi ánge boı aldyrǵannyń da esh artyqtyǵy joq», deıdi oblystyq «Jetisý» gazetiniń bas redaktory, aqyn Jumataı Ospanuly.
Qazaq estradasynyń «qara balasy» atanǵan Saıat Medeýov talaı ánshiler shyǵarmasyn sahna tórine alyp shyqqan kompozıtor Maqsat Jáýtikov jáne Merýert Muhtarqyzy syndy arnaıy kelgen qonaqtarmen qatar taldyqorǵandyq ónerpazdar keshti erekshe áserge bóledi. Birde kóńildi ásem án terbese, birde jaýhar jyr jan baýrady.
Rejısser Jasulan Zamanbekov keshti modern janrynda jańasha baǵytqa buryp, az ýaqyttyń ishinde kórkem dúnıege aınaldyrǵan. Igilikti iske sep bolǵan oblystyq mádenıet basqarmasy, Dánesh Raqyshev atyndaǵy fılarmonııasy aqyn-jazýshylarǵa barynsha qoldaý kórsetti. Qalamgerlerge degen peıilin alǵaýsyz nıetterimen bildirip, tik turyp qyzmet etti.
Astyn syzyp aıta keterligi, zal tola kórermen eshkimniń kúshteýinsiz, aqyndardyń shaqyrýyn qabyl alǵan jandar men jarnamadan kórip, júreginiń qalaýymen kelgender boldy. Ágárákı tapsyrmamen kelgender bolsa, beker kelmegenine kesh sońynda kóz jetkizdi. О́ıtkeni kórermen kesh sońynda shymyldyq jabylǵanǵa deıin qoshemet kórsetip turdy. Ketýge asyǵyp, esikke qaraı tura júgirgen jan balasy bolmady.
Jetisý oblysy
