«Amanat» partııasynyń atqarýshy hatshysy Dáýlet Káribek Qytaı Kommýnıstik partııasynyń Ortalyq Komıteti janyndaǵy partııa mektebiniń birinshi prorektory Se Chýntaomen kezdesip, partııaaralyq dıalogti damytý, ekonomıkalyq jáne mádenı-gýmanıtarlyq salalardaǵy ekijaqty áriptestikti kúsheıtý máselelerin talqylady. Taraptar parlamentaralyq jáne partııaaralyq deńgeılerde yntymaqtastyqty nyǵaıtýǵa ýaǵdalasty.
Basqosýda Dáýlet Káribek búginde eki eldiń memleketaralyq qatynasy tıimdi damyp kele jatqanyn atap ótti. Jaqynda Prezıdent Qasym-Jomart Toqaev «Bir beldeý, bir jol» halyqaralyq yntymaqtastyǵynyń III Forýmyna qatysty. Al ótken aıda Májilis cpıkeri, «Amanat» partııasynyń tóraǵasy Erlan Qoshanov Búkilqytaılyq halyq ókilderi jınalysy Turaqty komıteti tóraǵasynyń orynbasary Hao Mınszınmen kezdesti. Sondaı-aq atqarýshy hatshy partııanyń qazirgi saıası kún tártibi, Qasym-Jomart Toqaevtyń aýqymdy reformalaryn júzege asyrý jáne partııany jańǵyrtý baǵytynda júrgizilip jatqan jumys týraly aqparatpen bólisti.
QKP OK janyndaǵy partııa mektebiniń birinshi prorektory Se Chýntao qos memleket arasyndaǵy qarym-qatynastyń tarıhı jáne mádenı-gýmanıtarlyq aspektisine toqtaldy. Ol Qytaı Kompartııasy memleketter arasyndaǵy tatýkórshilik qatynasty odan ári nyǵaıtý maqsatynda «Amanat» partııasymen yntymaqtastyqty kúsheıtýge nıetti ekenin jetkizdi. Sonymen qatar is-sharaǵa qatysýshylar partııalyq oqytý men partııa kadrlaryn daıarlaýdy damytý salasyndaǵy ózara is-qımyldy talqylady.
Kezdesý sońynda taraptar partııaaralyq dıalogti nyǵaıtýǵa ýaǵdalasyp, ekijaqty jáne halyqaralyq mańyzdy máseleler boıynsha pikir almasty. «Amanat» partııasynyń atqarýshy hatshysy jáne QKP OK janyndaǵy partııa mektebiniń birinshi prorektory osyndaı kezdesýlerdi turaqty túrde ótkizý qajet ekenin alǵa tartty.
