Sportty serik etken carbaz

«Alaqandaı aýyl­da bir úıdiń balasyndaı baýyrmal ósken el-jurttyń bergen aq batasy kúsh-qýat berip, jiger syılaıdy», dep bastady sózin keıipkerimiz. 2008 jyly Beıjiń qalasynda jazǵy olımpııa oıyndary ótti. Tórtkúl álem kóz tikken baı­raq­ty básekede grek-rım kúresinen el na­mysyn Elamannyń aýyldasy Áset Mámbetov qorǵaıdy. Aýyl jurty álemdik deńgeıde bozkilemde beldesken balýannyń buǵan deıingi árbir jeńisine de balasha qýanatyn-dy. «Taıly-tuıaǵymyzben kógildir ekrannan jerles sportshynyń bozkilemge shyǵar sátin asyǵa kúttik. Áset aǵa úshin taqymyn qysyp, «aqudaılaǵan» aǵaıynnyń ishinde qara domalaq biz de júrdik. Áset aǵany júldeger tuǵy­ry­nan kórgen shaqta tóbemiz kókke bir eli jetpeı qaldy. Altynshoqynyń ǵana emes, muqym Alash eliniń namy­syn qorǵaǵan olımpıadanyń qola júl­de­gerine men sekildi barlyq bala eliktedik. Úlkender de bizdiń kúsh synas­qanymyzdy qyzyq kórip, «Qanekı, Ásettiń izin basatyn kim bar?» dep beldestirip jiberetin. Biz de bilek túre kirisetinbiz», deıdi bilekti sarbaz.

Keıinnen grek-rım kúresinen Qazaq­stannyń eńbek sińirgen sport sheberi, «Qurmet» ordeniniń ıegeri Áset Sekenuly týǵan aýlyna at basyn buryp, jergilikti jurtpen kezdesedi. Sol kez­desýde aýyl mektebine bozkilem­ge qajetti qurylǵylar­dy syı­ǵa ­tart­qan. Osylaısha, mektepte­ kúres úıirmesi ashylyp, budan bylaı balalar dalada emes, naǵyz balýan­dar sekildi bozkilemniń ústinde daıyn­dalatyn kúnge jetti. Bul ýaqytta bizdiń keıipkerimiz 3-synyp oqýshysy eken. Kúreske degen qyzyǵýshylyǵy osy­l­aı bastalǵan Elaman Baımov sporttyń osy túrin janyna serik etedi. Bilikti bap­kerdiń aldyn kórgen ol Semeı, Aqtó­be qalalarynda uıymdastyrylǵan saıys­tarda baq synaıdy. «Súıikti ádisim – jambasqa salý. 9-synyptan keıin Almaty qalasyndaǵy Avıasııa aka­de­mııasynyń kolledjine tehnık-elektrık mamandyǵyna oqýǵa tús­tim. Mamandyǵym tehnık-elektrık bolǵanymen, ushaqtyń qyr-syryn meń­ger­dim. Kolledjde oqyp júrip te kúresten qol úzbedim», deıdi ol. Bozkilemde bir aýnasa maýqy basylmaıtyn sarbaz – búginde kúresten sport sheberine úmitker.

Áskerı bólimde júrse de, sportty janyna serik etken jaýynger: «Bul jerde sport túrine barlyq jaǵdaı qarastyrylǵan. Bos ýaqytymdy sportzalda ótkizemin. Jaýyngerlik jasaq qatarynda kóshe tártibin kúzetemin. Sarbaz úshin sport asa qajet. О́ıtkeni qyzmet barysynda tártip buzýshy qarsylyq bildirip, qol kótergen jaǵdaıda toıtarys berý qajet», deıdi. Sondyqtan áskerı bólimde jaıaý jasaq quramyndaǵy sarbazdardy jekpe-jek urys-tásilderine úıretedi. Ondaı kezde Elaman grek-rım kúresinde qoldanatyn ádis-tásilderdiń qııýyn kelistirip, jekpe-jekke yńǵaılap alady. Bolashaqta mamandyǵy boıynsha jumys istep, otandyq áýe salasynyń áleýetin arttyrǵysy keletinin aıtqan ol: «Joǵary bilim alyp, boz kilemde beldesýdi toqtatpaımyn. Dáýlet Turlyhanov, Áset Mámbetov aǵalardaı ósken óńirdiń óskeleń urpaǵyn sportqa baýlyǵym keledi», dep aǵynan jaryldy. Biz armany asqaq, maqsaty bıik shymyr bilekti jaýyngerdiń baǵyndyrar belesi kóp bolýyn tiledik.