Bul joba Mádenıet jáne aqparat mınıstrligi men Azamattyq bastamalardy qoldaý ortalyǵynyń tapsyrysymen iske asady. Ár óńirde onyń ambassadory – jer-jerdegi jastar resýrstyq ortalyǵy.
«Qazaqstannyń Ekologııalyq qory» qoǵamdyq qory – jobanyń bıylǵy operatory. Jobanyń bul jolǵy basty ereksheligi – NEET sanatyndaǵy jastardy yntalandyrýǵa baǵyttalǵandyǵynda.
«Zhas Project» áleýmettik jobalar men bıznes-ıdeıalardy qarjylandyrý arqyly NEET sanatyndaǵy 18 jastan 35 jasqa deıingi jas otandastarymyzdy qoldaýǵa baǵyttalǵan. Konkýrstyń erejesimen zhas-project-karaganda-kostanai.kz veb-portalynda tanysýǵa bolady. Áleýetti qatysýshylar veb-resýrsta jeke tirkeýden ótýi, saýalnamany toltyrýy jáne qajetti qujattardy tirkeýge tıis. 24 naýryzǵa deıin aqparattyq-túsindirý naýqany ótedi, al ótinimderdi qabyldaý 25 naýryzdan bastalady», deıdi «Qazaqstannyń Ekologııalyq qory» qoǵamdyq qorynyń prezıdenti Aıgúl Ábdýalıeva.
Konkýrsqa ótinim berý úshin jeke kýáliktiń kóshirmesin, elektrondyq úkimet portalyndaǵy jeke kabınetten oblys aýmaǵynda tirkelgenin rastaý, qatysýshynyń osal mártebesin rastaıtyn qujattardy tirkeý qajet.
«Qatysýshy NEET sanatyna jatatyn, ótinim bergen ýaqytta turaqty nemese ýaqytsha 3 aı tirkeýde bolǵan, jasy 18–35 aralyǵyndaǵy el azamaty bolýǵa tıis. Byltyr 23 ótinish tústi, onyń 14-i qoldaý tapty. Bıylǵy konkýrsqa Qaraǵandy jáne Qostanaı oblystarynyń turǵyndary qatysa alady», dedi qor basshysy.
Shaǵyn granttar konkýrsyna qatysý týraly qosymsha aqparatty Sall-ortalyqtan alýǵa bolady. Konkýrstyń qorytyndysy osy jyldyń qarasha aıynda ótetin forýmda jarııalanady.
Jastarǵa jiger syılaıtyn «Zhas Project» jobasy 2022 jyly Almaty, Jetisý, Qaraǵandy, Mańǵystaý, Túrkistan jáne Ulytaý oblysynda qanatqaqty rejimde bastalǵan edi. Byltyrdan bastap elimizdiń barlyq óńirinde iske asyrylyp keledi. NEET jastary arasynda kásipkerlik deńgeıin arttyrýdy kózdeıdi.
Qaraǵandy oblysy
